قدر عبد الحليم حافظ إنه يحسم معركته مع صباح بـ خصوص اسم مين ييجي قبل مين في أفيش الفيلم وتتراته.

بـ نتكلم هنا عن فيلم "شارع الحب" عاشر أفلام عبد الحليم حافظ في تلات سنين فقط لا غير، من أول عرض لـ فيلم "أيامنا الحلوة" (1955) اللي كان فيه تالت اسم بعد عمر الشريف وفاتن حمامة، لـ حد فيلمنا (1958).

تلات سنين خلوه النجم الأول في السينما والغنا والبلد بـ حالها.

صباح كانت نجمة بقالها سنين، فـ كانت متخيلة إن اسمها هـ يبقى الأول، دي مسألة مفروغ منها، مكنتش عارفة هي بـ تتعامل مع مين؟ ومين ده هو اللي كسب، وبقى البريمو.

"شارع الحب" فيلم يخض، من تقل الأسماء المشاركة فيه، هو من إنتاج حلمي رفلة، واحد من اللي أسسوا صناعة السينما في مصر، راح درس مكياج بره، ولما رجع بقى ماكيير، بس طبيعة الجيل ده، اللي لمع في الأربعينات، كانت إنه لما يد إيده في الصناعة، ما يسيبش حاجة غير لما يعملها، فـ كتب وأخرج وأنتج، وكتير من أفلام عبد الحليم حافظ هو شريك في صناعتها سواء بـ الإخراج أو الإنتاج أو الاتنين.

ومع إن رفلة مخرج، بس شارع الحب مش إخراجه، ده واحد من أهم أعمال عز الدين ذو الفقار، "المخرج الذي يشرب زجاجة ويسكي كل يوم"، حسب غلاف مجلة المصور في الخمسينات، وده مكنش ساعتها ذم ولا فضايح ولا شاهد قبل الحذف ولا مقاطع بلوتوث ساخنة، كان سلوك عادي جدا، والغلاف ده كان في حوار أجرته المجلة معاه، وهو اللي قال المعلومة دي.

ذو الفقار من الناس اللي ينفع توصفه بـ إنهم "ابن موت"، مات صغير سنة 1963، بعد ما عدى الأربعين بـ شوية، لكنه كان عمل فيهم تاريخ سينمائي بـ الطول والعرض والارتفاع، وكلنا عارفين إنه أصلا كان ظابط في الجيش، زي يوسف السباعي اللي كتب السيناريو والحوار لـ الفيلم.

شارع الحب هو "شارع محمد علي" اللي بـ نقرا إهداء ليه على تترات الفيلم، اللي بـ يتعامل مع الشارع بـ امتنان ومودة صادقين، الهدف من الفيلم هو رد الاعتبار للشارع، وللآلاتية الغلابة اللي بـ يعتبروه سوقهم، وهي صورة وصفها صناع الفيلم بـ إنها باسمة، ضاحكة، مش عايزة تشغلك بـ قضايا وفكر، زي ما عمل جاهين وحسن الإمام وسعاد حسني وتحية كاريوكا بعد كده في "خلي بالك من زوزو"، هو بس عايز يحطك في مود متصالح وحابب الشارع وناسه.

اختيار ذو الفقار للإخراج، والمشاركة في كتابة السيناريو والحوار (تظبيطه على الأدق) ضمن للفيلم خلطة سحرية كانت بـ تجنن البشرية وقتها، كان ذو الفقار هو اللي بـ يعرف يعمل فيلم تجاري زي الكتاب ما بـ يقول: كوميديا وإثارة وبوليسية واستعراضات وأغاني وكله كله في باكيدج واحد، المتعة والتسلية من جميع أطرافها.

حليم وصباح لزوم الأفيش والنجومية والأسماء والأغاني اللي هـ يعملها الصف الأول من المؤلفين والملحنين: مأمون الشناوي ومرسي جميل عزيز والموجي والطويل ومنير مراد.

لكن دول مسنودين على جبل من الممثلين: زينات صدقي، عبد السلام النابلسي، عبد المنعم إبراهيم، منيرة سنبل، وأغلب فرقة "ساعة لـ قلبك" ومعاهم حسين رياض (لما مات كان مثل في 80% من أفلام السينما المصرية، وده رقم مش مبالغة).

لو كنت عايش وقتها، وشفت أفيشات الفيلم ده، كنت هـ أبات جنب السيما من أول ما يحطوا الأفيش، لـ حد أول عرض.

الأيام الجاية بقى هـ نـعيش مع "شارع الحب" وأبطاله.

يالا بينا