العيال العفاريت .. لبسوا أم كلثوم مايوه وباعوا المدرسة بالناظر

السبت، 18 نوفمبر 2017 06:52 ص

العيال العفاريت .. لبسوا أم كلثوم مايوه وباعو المدرسة بالناظر

العيال العفاريت لازم يعرفوا إن سور المدرسة مش للنط.. دا ليه مهمة عميقة تانية.. بتتلخص في إنك تعبر للناس باللي في خيالك.. متبوصش تحت.. أقصد تعبر للناس عن اللي بيدور في دماغك.. وطبعًا بما إن ظروف الجيل الجديد تخليه أكتر تحرر مننا.. فلازم تكون النتيجة إن تعبيره عن الشخصيات العامة والأحداث غير الجيل المحافظ اللي قبله.. ودا طفح على أسوار المدارس بجمل ورسومات تخلي الواحد يضرب نفسة طلقة..

العيال العفاريت لبسوا أم كلثوم مايوه وخلوها تعوم

تعبيرات صادمة بس بصراحة جامدة زحليقة.. العيال الفقرية اللي عاملين نفسهم فنانين وبيتولوا مهمة رسم سور مدرسة غيروا الواقع.. على طريقة فنون أمريكا اللاتينية اللي بيسموها "الواقعية السحرية".. إنك تلبس الست أم كلثوم مايوه دي حاجة بعيدة عن الخيال.. انت كده مش صايع بس ده إنت عديت مرحلة الشبحنة ووصلت للبراميل.. إنك تغير كلمات قصيدة لبيرم التونسي من "المغنى حياة الروح" تحولها لـ"الرياضة غذاء الروح" عشان تخدم على رسمة عرة على السور ده إنت بقا قطعت بطاقتك.. إنك تعمل إعلان على سور مدرسة تعرض فيها للبيع.. وتحط الناظر هدية فوق البيعة.. إنت كده عديت مرحلة الأستروكس ..

العيال العفاريت عرضوا ناظر للبيع على سور المدرسة

العيال العفاريت حرفوا في اللغة على سور المدرسة

مش هننسا الحبيبة.. تلاقي الواد فاكر إنه لوحده بس الواقع بيقول إن البنت اللي مقضيها معاها ماشيا مع نص صحابه.. ما علينا مش هندخل في منطقة حساسة.. البورم كاتب بحبك يا بطة.. واحد تاني كتب كلمتين كره البت فيه: "هياء.. أُحبك حب.. ما يعلم بة ألاء الله".. من ساعتها مجمع اللغة العربية أعلن استمرار انعقاده بشكل طارئ لحد ما يفك الطلاسم اللي فلانتينو كتبها.. الموضوع مبيقفش هنا.. وصل لدرجة إنهم حرفوا في أصول اللغة العربية وبدلت حرف "الصاد" بـ"السين"..

العيال العفاريت طلعوا مشاعرهم على سور المدرسة

أما بقا العيال العفاريت الشاطرة في الإملاء بيصطادوا في المياه العكرة.. وبيبقوا عاملين فيها مناضلين في نفسهم.. تلاقي واحد منهم عامل فيها دنجوان بيتغزل في حبيبته كاتب: "أنتِ جميلة كساعة إضافية من الكهرباء".. واحد تاني جاب بـ25 جنيه سبراي ومرمط الحيطة.. وفي الآخر كتب: "الرجاء عدم الكتابة على الجدران".. الفالح مش يسكت ويتدارى لا.. دخل في تحدي مع أشباح غيره بس كان واضح إن قلبه كان أجمد منهم.. وكتب اسمه..

العيال العفاريت بتناضل على سور المدرسة