لما تبقى متحاصر بأفلام سيكوال وسوبرهيروز وزهقت منها.. دلوقتي بقى عندك فرصة ف فيلم Dunkirk واللي بيتكلم عن حصار برضه بس في دانكيرك.. شغل نضيف ملوش أجزاء تانية ومش مليان مؤثرات بصرية من غير لازمة.. والأكتر من كدة إنه جد جدا.

الفيلم متقسم على 3 مواقع جزء للجنود على الشط في دانكيرك في فرنسا .. جزء للمدنيين في سواحل إنجلترا وهما في بيستعدوا لعمليات إنقاذ كبيرة.. وجزء تالت للمعارك الجوية.. فين شرير الفيلم؟؟.. طبعا الشرير الواضح في الفيلم زي معظم أفلام الحرب العالمية الثانية هيبقى النازيين.. لكن هنا مش هنشوف وش واحد منهم.. لأن العدو الأصلى في معظم أفلام كريستوفر نولان هو الوقت.. واللي كل شخصيات الفيلم في حالة سباق معاه من مشهد البداية..

الفيلم كله بيحكي عن جنود الحلفاء المحاصرين على الشط في دنكيرك ودة مكان ف الجو الصافي ممكن الجنود يشوفوا فيه أطراف الشواطئ بتاعت انجلترا..

دة يوصلك ويحسسك حالة اليأس اللي كانت عند 400 ألف جندي من بريطانيا وفرنسا وكندا وبلجيكا.. النازيين محاصرينهم ولسبب ما مفتحوش هجوم يقضي عليهم ويخلص الحرب كلها.. لأ سابوهم على الشط مع غارات جوية من وقت للتاني.. اليأس من الانقاذ وعدم معرفة امتى هيموتوا هيخلي المشاهد لازق في الكرسي طول الفيلم..

كمان بيظهر اليأس دة مع الجندي الجبان اللي مش عايز يرجع لزمايله على الشط.. أو في الجندي اللي زهق من الانتظار فقرر ينزل ويعوم في القنال الانجليزي كله لوحده مع ان النتيجة معروفة.. أو في الجنود اللي بينقلبوا على زميلهم في وسط المركب عشان يضحوا بيه..

أما في الجو فعندك معركة تانية مع الوقت برضه.. الطيارات ليها خزان وقود محدود يعني زمن طيران محدود والحركة والمناورة محسوبة.. ولازم تأمن المراكب والسفن في عرض البحر وهي بتنقل الجنود وفي نفس الوقت تحمي نفسها من الطيارات الألمانية..

وفي البحر نفسه المعركة مع الوقت واضحة.. امتى توصل للشط التاني ومن غير ما تضربك طيارة أو طوربيد ألماني.. والقرارات الصعبة اللي بتخلي الجنود يستغنوا عن زمايلهم عشان تقل المراكب.. وكل دة متصور على طريقة 70 مللي يعني صورة عريضة مناسبة أوي لفيلم مواقع التصوير بتاعته واسعة زي السما البحر أو الشط..

أما اللي بيأكد عظمة أو خطورة الوقت هو موسيقى الساوند تراك اللي من تأليف هانز زيمر.. واللي زيه زي نولان بيحب يدخل الوقت في موسيقى أفلامه عشان كدة هو أحسن دويتو مع نولان ف أكتر من فيلم.. وموسيقى الوقت عنده واضحة في افلام زى interstellar و inception ودلوقتي مع Dunkirk.

الموسيقى فيها دقات ساعة باستمرار لكن مع خدعة زيمر بقى محترف فيها من زمان وهي إنه بيوهم المشاهد بإن التون هيعلى دلوقتي.. لكن اللي بيحصل ان النغمة الهادية مستمرة ولحد ما تختفي خالص وبدون ماتعلى.. ودة بيجيب توتر للجمهور المركز.. وبكدة عرف يخليك تحس بنفس الخطر بتاع الجندي على الشط.. اسمع الموسيقى هنا ولاحظ..

في قطاع تاني من الجمهور شاف الفيلم عشان سبب واحد وهو هاري ستايلز اللي بيأدي أول دور سينما بالنسباله.. الغريب إنه فعلا نجح في دوره والأغرب إن كريستوفر نولان لما اختاره مكنش عارف شعبيته قد ايه أصلا وكل اللي قاله إنه كان يستحق الدور وبس..

ايه هي مشكلة الفيلم؟.. بالمستوى دة صعب تلاقي فيه عيوب وحتى أكبر حاجة كان ممكن بوظه وهي الجندي الكومبارس على الجسر وهو مبتسم ووشه باين في الكاميرا في المشهد اللي المفروض في غارة ألمانية عليه.. لكن لحسن الحظ اللقطة اتشالت من الفيلم بعد ما الجمهور خد باله منها..

الخلاصة : فيلم Dunkirk على طريق الاوسكار لنجمين بس واضحين فيه.. المخرج نولان والملحن هانز زيمر.. أما الممثلين فكان أدائهم كويس لكن كان Team Work مش إبداع من شخص واحد بيطغى على حضور وأداء الباقي.. فيلم يستاهل تمن الذكرة ببساطة ومن غير 3D.