الفنانة مي كريم خريجة فنون جميلة قسم تصوير 2003، بدأت الرسم منذ الصغر، وقررت في الكلية أن تسجل أهم أحداث حياتها ورحلاتها حول العالم بالرسم والفن من خلال مدونة صندوق مي المرسومة والتي استخدمت فيها قصاقيص تذكارية ارتبطت بالحدث لتجعل حياتها موثقة بشكل مرئي وواقعي في سكيتشات فنية رائعة، "دوت مصر" حاورها للحديث عن تلك التجربة المختلفة.

الأول عرفينا بنفسك؟

أنا مي كريم خريجة فنون جميلة قسم تصوير سنة 2003، بدأت الرسم منذ الصغر، وقررت وأنا في الكلية تسجيل أهم أحداث حياتي ورحلاتي حول العالم بالرسم والفن من خلال مدونة صندوق مي المرسومة واستخدمت فيها قصاقيص تذكارية ارتبطت بالحدث لتجعل حياتي موثقة بشكل مرئي وواقعي في سكيتشات فنية رائعة، اني اتعلم واخلص وبعد كده ارسم بالأسلوب اللي بحبه لأن الكلية فيها قيود ومش بتسيب لك مساحة الاختيار فاتخرجت ورميت الشهادة ورا ضهري وابتديت اعمل اللي بحبه وهو رسم الكوميس وillustration.

إزاى عرفتي تخلقي أسلوب مختلف لرسمك؟

جبت كتب وابتديت اقلد وارسم واتعلم وبقى مع الوقت ليا طريقتي وأسلوبي ولسه بتعلم.

احكيلنا شوية عن فكرة صندوق مي؟ وليه عملتي بلوج؟

قررت اعمل بلوج عشان اجمع فيه كل شغلي وفي نفس الوقت احكي فيه حكايات عن الناس اللي بقابلها وكمان البلاد اللي بسافر ليها اللى فيها حاجات نفسي تكون عندنا في مصر وعن مدينتي أسكندرية لأن كل يوم بكتشف فيها أماكن تستحق الزيارة يعني ممكن تقول بلوج عن يومياتي ممكن متهمش حد وممكن تهم ناس، المهم إني بحاول أوري الناس إنها لازم ترسم أو تكتب عن حياتها وتجاربها مش مجرد حاجات بتشوفها أو أماكن بتبقى ذكرى في صورهة على الكاميرا أو الموبايل وخلاص.

البلوج فيها حاجات تانية غير التدوين؟

في باب اسمه ينصح بالزيارة برسم فيه الأماكن اللي محدش يعرفها أوي وكمان أوقات برسم أكلات مختلفة والمقادير بتاعتها وفي أفيشات الأفلام القديمة.

احكيلنا عن فكرة أفيشات الأفلام القديمة؟

الإعلانات دلوقتي وأفيشات الأفلام أغلبها بيبقي تقليد للغرب لكن الأفيشات بتاعة زمان تعتبر ثروة لأنها أولا بتترسم وتتلون يدوي وبيكون ليها فكرة وبيدخل معاها أوقات كلام لذيذ وجمل تضحك فحاولت إني أرسمها وأعيد رسمها بطريقتي مع الاحتفاظ بالكتابة اللي عليها لأنها فعلا بعتبرها من الكنوز بتاعة مصر لأن فيها إخراج وإتقان وتصميم ورقي وكله عشان كده رسمت منها أكتر من 120 أفيش وإعلان وعرضتهم قبل كده في معرض مكتبة الإسكندرية ولسه في مئات الإعلانات والإفيشات اللي عايزة أرسمها.

الرسمة بتاخد منك وقت قد إيه؟

ملهاش وقت معين حسب الموضوع اللي برسمه وأغلب الوقت برسم في الشارع وأكمل في البيت لو الوقت مكفاش بره.

في رسمة معينة بتحبيها؟

مفيش رسمة معينة بحبها مش بفكر غير إني اتعلم وأكون أحسن من الرسمة اللي قبلها.

لية بتشوفي تدوين الحياة اليومية بالرسم أفضل من الكتابة؟

التدوين بيكون بالرسم بالنسبالي أحسن لإني مش بعتبر نفسي كاتبة كويسة، الرسم فيه صورة وألوان بتشد اللي بيتفرج وأسهل من الكتابة أنا بكتب لكن عناوين بسيطة او ملاحظات عشان الناس تفهم فكرة الرسمة كاملة عشان كمان جيلنا او الجيل اللى قبلنا  بالنسباله الكتابة الكتير شئ صعب عليه ومتعودش علي كده غير عدد قليل من الناس اللى بتشترى كتب لكن الرسم مع الكتابه افتكر انه حاجه مش منتشره كتير في مصر واسهل للناس.

بنشوفك بتستخدمى صور فوتوغرافيا وقصاقيص ورق كلمينا أكتر عن نوع الفن اللي بتستخدميه؟

الفن ده اسمه كولاج وأنا بستخدمه مع الرسم بتاعي أوقات بحتفظ بورق للأماكن اللي بزورها مثلا أكياس تذاكر ريسيت أو كارت أو أي حاجة تدل على المكان اللي روحته وأحاول ادخلها في الرسمة، تقدر تقول مبرميش أي حاجة وأوقات بطلب من الناس اللي بتشتغل في الأماكن اللي بروحها أي حاجة عليها اسم المكان حتى في السفر لو ملقتش ممكن اطلب كلينكس مكتوب عليه الاسم أو كيس للمكان وكمان بشترى الكتب القديمة والورق بيكون متهالك وأصفر وبدخله مع الرسم لإني كمان بشتغل على ورق غامق فبيليقوا مع بعض.

في فنانين في مصر غيرك بيستخدموا الكولاج مع الرسم؟ ولو في مين بيعجبك شغله؟

في مصر لا مفتكرش، بس في محمد وهبة بيرسم الشوارع والأماكن بمنظور معين وفعلا مشفتش حد زيه، بس مش قريب من شغلي هو أقوى في حتت معينة غير كده مشفتش حد بيرسم يومياته أو الأماكن اللي بيروحها، وعلى فكرة، الرسامين في أسكندرية محدودين في المجال ده غير بره مصر، طريقة الرسم دي منتشره جدا وفي منها كتب كتير بتطبع لكن في مصر لسه مفيش الاهتمام بالفن ده الريبورتاج كوميكس أو رسم الحياه اليومية.

ليكي أي اعمال منشورة فى جريدة أو مجلة؟

لا مليش أعمال، لسه بس اشتركت في معارض كتير.

ليه فنانين الأسكندرية مش واخدين حقهم زي القاهرة؟

فنانو أسكندرية أغلبهم مش بيعرفوا يوصلوا إزاي ولمين غير أن القاهرة هي النقطة الرئيسية اللي كل الناس بتروحها لأن فيها أغلب دور النشر والمجلات والشركات ومكاتب الدعاية والإعلان وأغلبهم بيطلبوا ناس بتشتغل ديجيتال أرت مش فري هاند.

نفسك توصلي إيه للناس بصندوق مي؟

نفسي أعرف الناس أنها ممكن برسومات بسيطة وكتابات بسيطة وملاحظات أنها تدون يومياتها وحياتها قبل ما يكون لغيرها يكون ليها تفتكر بيها أهم اللحظات اللي في حياتهم والأماكن اللي زاروها وحبوها والناس اللي أثرت فيهم حتفرق كتير لو حد لقى لنفسه هواية بعيد عن ضغوطات الحياه حتى لو منشورهاش زي أو حد شافها تبقى حاجة خاصة بيهم.

مابتفكريش تعملي معرض تعرضي فيه تدويناتك؟

مش بفكر في معرض على قد ما بفكر إني اعمل كتاب واجمع فيه كل شغلي ورسوماتي وحواديتي غير إني نفسي أسافر أماكن كتير أرسم فيها وأوري الناس بالرسم والحكايات أوجه الاختلاف بين الحضارات والشعوب واجمع كل ده في كتاب لأن أوروبا وبعض الدول العربية فعلا فيها ما يستحق الرسم والتدوين وده عملته ورسمته بس محتاجة لسه أسافر أكتر واتعرف على ناس أكتر.

هل ممكن صندوق مي يخرج برا حيز البلوج ونشوفه مطبوع في مجلة؟

أنا فعلا بحاول اعمل مجلة أو كتاب صغير اجمع فيه شغل السنين اللي فاتوا بس محتاجة حد يساعدني في الإخراج الفني للكتاب بدور وإنشاء الله احاول أنا كمان بحاول أعمل مجلة صغيرة، أنا وصديق ليا اسمها مكسرات مجلة كلها رسومات وحتبقي فيها أبواب مختلفة.

رابط بلوج صندوق مي

http://sandoq-mai.blogspot.com/

على فيس بوك:

https://www.facebook.com/SandoqMai?fref=ts