الجحيم هو التكرار.. الجحيم هو الملل.. الجحيم هو القلق.

بنزل يوميًا الشغل، وبجيب كل كام يوم طلبات البيت، ومفيش جديد مفاجئ بيحصل يقضي على الروتين ده.. كل يوم زحمة.. كل يوم بتتخانق وأنت بتركن قدام شغلك مع السايس.. كل يوم بتلاقي الأسعار بتغلى.. كل يوم بتشوف نفس الوجوه الإعلامية بنفس الأسلوب.. وكل يوم بتفتح صفحتك على "فيس بوك" تلاقي الخبر المعروف."شاهد فستان الفنانة التي أثارت الجدل"، وطبعا كل يوم بتبقى خايف لا تكون ضحية انفجار رخيص من ناس رخيصة.. مفيش جديد.. كل نقطة من دول تستاهل مقالات كتير.. وكلها حاجات خنقاني.

المرّة دي قررت أواجه كل حاجة خنقاني بالغنا.. ونويت أكتب طقطوقة مع كل موقف مايعجبنيش أشوفه.

حوّلت كتير من اللي بيحصل ده لطقاطيق بدندنها.. وبعد كام يوم لقيت عندي اللي هتقراه تحت ده.. يمكن تلاقي فيهم كام طقطوقة مناسبة ليك.. ويمكن يكون بداية لطقاطيق كتير تعملها لنفسك وترجع تدندنها.. المهم مهما كانت الدنيا دوشة.. زحمة.. حر.. قلق.. سيبك.. ودندن.. يلا ندندن.

الأربعاء السابعة صباحا

بحب أكل الفول أصلي على العربية..
مع إني مش شعبي وكويسة الميزانية..
بصيت لقيت جنبي ناس راقية وغنية...
لما حاسبته فهمت.
بكام هتاكل فول وعيش و طعمية؟

الأربعاء الواحدة بعد الظهر

الحر بيوتّر وينشف الريق..
كالعادة هتأخّر والخُلق بيضيق..
والشمس كارهانا.. مع زحمتك يا طريق..
على كوبري مايو ماعرفتش.. أنا سايق ولّا بايني غريق.

الأربعاء الثالثة عصرا

ركنت عربيتي ونزلت شركتي جري..
لقيته بيصفّر ويقولي ثانية أنا جاي..
إديني خمسة جنيه.. من غير ماتسأل ليه..
دفعت ليه يائس من سيستمك يا حي..

الأربعاء السابعة مساءً

نزلت أجيب لحمة و خضار وحبة أوطة..
لقيت الحسبة فتحت ومابقتش مظبوطة..
لقتني هضايق وهكتئب واغتم.. بلاها حرقة دم..
تخنان هقضيها خص... ها يا مصر مبسوطة؟

الخميس الواحدة صباحا

الست المذيعة دي بتتطلع تنرفز فيّا..
وتقوله مش ندمان.. ببرود وحنيّة..
لو يوم أكون مجرم.. لو بس أشوفها في يوم..
أضربها على بقها.. قلمين ولكامية.

السبت السابعة مساء

سافرت ع الفيوم.. بيتي وبيت أهلي..
ركنت عربيتي ومحدش ندهلي..
لكن رجعت وقلت.. أركنها هنا في أمان ولا هتتفجّر وهصحى وأنا ندمان؟
ضحكت على نفسي.. ومشيت وأنا قلقان.

الأحد التاسعة صباحا

عن النت ياما مقالات بعناوين كتير هايفة..
أنا مالي بالفستان بتاع مروى أو هيفا؟
بيقولوا أثار الجدل.. مع إن الجدل ماتثارش..
يمكن أثار الكاتب وقال يجيب قراء محرومة مش شايفة.

لمتابعة الكاتب