حوار| شيرين عمرو: "ماكنش معايا فلوس أسجّل في أستوديو"

هشام مكين

الأربعاء، 15 أبريل 2015 07:01 م

شيرين عمرو، عازفة ومؤلفة، عرفت بأغنية "أبعد مكان"، التي أذيعت في فيلم "مايكروفون"، حيث كانت أول تجربة غنائية لها باللغة العربية مع فريق "ماسكارا".

حققت الأغنية نجاحا كبيرا عبر الإذاعات الغنائية ومواقع التواصل الاجتماعي، فكونت فريقا خاصا بها أسمته "شين"، أصدرت العام الماضي ألبوم "عالم تاني"، لتتوالى حفلات شيرين مع فرقتها خلال الأشهر الماضية. كان لـ"دوت مصر"، هذا الحوار معها، بعد حفلها الأخير في "جريك كامبس".

احكيلنا الأول بدايتك كانت إزاي؟

كنت بلعب جيتار من وأنا صغيرة في بيتي في الإسكندرية، وبعدين كونت فريق "ماسكارا" مع نانسي منير، وبعدها عملت "باند" تاني اسمه "شين".

أهلك في البداية كانوا رافضين فكرة الغنا.. احكيلنا عن الفترة دي وإزاي قدرتي تقنعيهم؟

معتقدش إنهم لسه مقتنعين أوي أو على الأقل مش كلهم.

كل اللي عملته إني أتناقش مع والدتي، وأفهم وجهة نظرها، وكانت خايفة عليا، وده طبيعي، عشان كده كوّنت فرقة "ماسكارا" من البنات بس، عشان ماتقلقش.

ليه قررتي تعملي مشروع غنائي خاص، بعيدا عن ماسكارا؟

عشان في "ماسكارا" بنلعب موسيقى "ميتال" عنيفة، وأنا بحب ألعب "بوب روك"، فكان لازم أفصل بين "ماسكارا" و"شين" عشان الجمهور مايتلخبطش.

مين هما أعضاء "شين"؟

شيرين عمرو Vocalist /composer/guitarist /lyricist

أحمد الجوهري Drummer/ back vocalist

علي قليوبي Guitarist/ composer

محمد الفرا Bassist

كلمينا شوية عن ظروف إنتاج ألبومك الأول "عالم تاني" ومشاكل الإنتاج في مصر، خاصة للموسيقى المستقلة؟

وقتها ماكنش معايا فلوس أسجل في أستوديو كبير، بس قدرت أسجل في أستوديو Vibes، وكنت مبسوطة جدا عشان كانت عملية الإنتاج مفيهاش مشكلة معاهم.

المصنفات الفنية في مصر مش بتتعامل مع أفراد، عشان كده الألبوم مانزلش بشكل رسمي في السوق، عشان كمستقل مش هتعرف تتعامل أوي مع الجهات الحكومية، بس في فرق عرفت تسجل نفسها كشركة إنتاج زي "كايروكي" و"مسار إجباري"، وعرفوا ينزلوا ألبوماتهم في السوق، لكن ده شيء معقد بالنسبالي، لأنه محتاج فلوس ومحامي. وأتمنى يكون في سهولة أكتر في الموضوع ده.

ليه الموسيقى المستقلة مش واخدة حقها زي الأغاني التجارية؟ هل العيب في الإنتاج ولا الجمهور مش متعود على الأغاني المختلفة؟

في رأيي، الدائرة الإنتاجية في صناعة الموسيقى مش ماشية مع دائرة إنتاج الفرق، يعني كل شركة إنتاج ليها موزعين، سواء موزع مرئي زي "ميلودي" و"مزيكا"، أو موزع CD وكاسيت، الفكرة إنهم بيمشوا بتناسق مع بعض.

الموسيقى المستقلة مش كده، عشان مصممة تخلق دوائر إنتاج مختلفة، من غير ما تخلق طرق توزيع مستقلة ومختلفة ومبتكرة.

مافكرتيش تتكلمي عن قضايا ومواضيع عامة في أغانيكي غير تجاربك الشخصية؟

لا خالص.

ليه غيريت اسم الباند كذا مرة؟ من شيرين بروجيكت لسى بروجيكت لشين؟

أصحابي والناس بيقولولي "شين"، فكنت شايفة إن "شين" يبقى الاسم المنطقي للفريق.

عرفنا إن أغنية "خليك" كانت مكتوبة في الأصل لدينا الوديدي.. احكيلنا قصة الأغنية دي؟

أنا ودينا أصحاب جدا، وفي الفترة اللي كتبت فيها الأغنية دي، كنا بنشوف بعض كتير، وأنا كنت حاسة بالكلام بس، وأنا بلحن الأغنية تخيلت دينا وهي بتغنيها، وأنا عارفة صوتها كويس أوي، وكنت شايفة إنها لايقة عليها، بس اتكسفت أسمعهلها بعد كده.