المهرجان هنا نظام الأكل فيه زي اسمه "taste of dubai" أو مذاق أو طعم دبي، أنت مش جاي تملى بطنك أنت جاي تمتع حواسك كلها، مش بس لسانك، جاي تمتع عينك بطريقة تقديمهم للأكل، والشو اللي بيعملوه.

 أول ما تقرب ناحية أي مطعم، الناس بتبتدي ترقص وترحب بيك وتدعوك تجرب، بيعملولك الأكل أو الشرب بحب، وبيعملوا البدع عشان تشتري منهم مع إنها مطاعم كبيرة جدا هنا، بس ده ميمنعش أنهم في مهرجان والناس جاية تتبسط، فلازم يبسطوهم بكل الأشكال.

هنا بتقدر تمتع حاسة الشم اللي بتبعت إشارات متضاربة لمخك، مابتبقاش عارف تروح فين، عند الكوريين اللي بيشووا فراخ بطريقتهم، ولا الأفارقة اللي بيشووا سوسيس إفريقي هوم ميد، ولا المكسرات المحمصة مع كراميل، ولا الطعمية والشاورما اللي يجننوا هناك ومختلفين تماما عن اللي بندوقه عندنا، وطبعا النصيب الأكبر من المتعة لحاسة التذوق اللي مصروف كل الفلوس والجهد ده عشانها!

 رحت عند ركن مطعم the act مطعم من "بيرو"، أول مرة أجرب أكلهم وأول مرة أسمع اسمهم وسط المطابخ العالمية، استقبلتني بنت لابسة لبس مناسب لسهرة مش لبس نهاري أبدا، وعرفت بعدين أن مطعمهم مش بس مطعم هو نايت كلوب، استقبلوني بصريخ "welcome sir whohooo"، عشان كنت أول واحد يشتري منهم في أول اليوم.

 اتكلمت مع مديرة المطعم ورشحت لي طبقهم المميز والأكثر مبيعا، وهو  البط المتشوح مع رز بالكزبرة والفول الأخضر والرمان وصوص البرتقال، هو من المطبخ التابع لدوله "بيرو"، بس بتأثير آسيوي، ميكس عجيب بس طلع حلو جدا لما دوقته، اسم الأكلة في المنيو هو Arroz con pato ، الرز حلو أوي تحسه شوية شبه الريزوتو كريمي شوية كده وطعمه هادي، مع  مزازة وسكر الرمان عاملين جو يجنن والفول الأخضر مدي طعم حلو والرز نفسه طعمه تحفة بس كزبرة، وده عاجبني أني قادر أحدد الأطعمه وأميزها.

 البط مع جلده المتشوح والمكرمل يجنن و مستوى كويس قوي، بيدوب مع الأكل، صوص البرتقال طعمه مزز وحامض ومسكر في نفس الوقت يشبه في كثافته المربى بس أخف.الطبق الصغير ده للتجربة كان بـ 30 درهم، بس حقيقي كان ممتع، والأمتع إني اتعرفت على أكل بيرو أو حتى طبق منها.

ومن بيرو لإفريقيا والسوسيس المشوي على الطريقة الإفريقية في مطعم kiza، دول كانوا اكثر حماسا وجنان رسمي، استقبلوني برقص سريع وطاقة وغنا وشقلبة في الهوا وتصفيق في الآخر، وبيتكلموا بسرعة وبيعملوا الأكل بسرعة، حتى خلوني أنا كمان أعمل كل حاجة بسرعة، اخترت الأكل وكان boerowrs roll وهو عبارة عن سوسيس معمول هوم ميد عندهم وبيتشوي وبيتحط عليه صلصة حمرا "سبايسي" ومسكرة جدا وبصل أبيض كتير دبلان ومتبل بتتبيلتهم، وفي عيش عادي يشبه الفينو بتاعنا بس أحلى وتخين، الساندوتش نزلي بعد 3 ثواني، بس كان بارد رجعته، وعملولي واحد تاني بعيش جديد وبصل أقل.

أهم حاجة فيه كانت الكواليتي بتاع السوسيس كويس، مش زي الدارج في الأسواق، طعمه لحمة طبيعية مفرومة محشية في السوسيس، ومشوية على الجريل مش فحم، والصلصلة طعمها هايل بس حرّاقة جدا والبصل أقل حاجة عجبتني لأنه دبلان فقد قرمشته والقرمشة بتدي freshness، وكمان مهواش مطهي كويس أو متكرمل عشان برضه يبان طعمه، معجبنيش إضافته ومش حاسسها مؤثرة في الطعم، كان حاجة غلسة عايز اتخلص منها، وكان سعره كتير جدا كمان، الساندوتش كان ب 25 درهم، وتقييمي للمطعم في العموم متوسط بالنسبة لمستوى المطاعم هنا اللي بيقدموا حاجات مبهرة أكثر ولها مذاق مميز.

شاهد صورا أخرى للمهرجان