نظرا لوجود العديد من الانتقادات الموجهة لفن "الراب"، منها وجود الألفاظ الخارجة ضمن كلمات أغاني الراب والهيب هوب، فكان لابد من معرفة سبب ارتباط "الشتيمة" بـ"الراب"، خلال حديثنا مع إم سي أمين، في الجزء الثاني من الحوار الذي تضمن الكثير من المعلومات عن ألبومه الذي لم يخرج للنور بعد، وأمور أخرى متعلقة باعتزال الكثيرين مؤخرا لأسباب غير واضحة من وجهة نظر أمين.

ليه الراب مرتبط بالشتيمة؟

أنا كنت سبب فيها ومش ندمان عليها ولو اتعاد الزمن هعملها تاني، وهي الـ battel والشتيمة، أو التحديات، لأنه جزء لا يتجزأ من ثقافة الهيب هوب، لأن لازم يكون في تحدي وفرض سلطة وإثبات ذات في الراب، والناس اللي بتطلع تقول إنها بتحل مشاكل وبتعالج حاجه بالراب، الدنيا مش بيضه أوي كده، ومينفعش أحصر نفسي في حاجه واحدة بس.

استمع إلى أغنية الثورة مستمرة 

بس ليك أغاني فيها شتيمة؟

أنا بسيب الاختيار للمستمع، ولما بعمل أغنية فيها "شتيمة" بسيب تحذير للمستمع، طب وليه شتيمة؟ عشان إحنا كده، أنا برة المايك زي وانا ماسك المايك، ومحدش يعملي فيها إنه رابعة العدوية، وفي ناس بتحب ده، والغريب إن أكتر أغاني بتطلب هي اللي فيها شتيمة، مع العلم إن في حفلاتي اللايف أنا مش بشتم، ولما بيبقي في لفظ في أغنية بكست، فبلاقي الجمهور اللي ع الأرض هو اللي بيقولوها، وحصل معايا في حفلة في ساقية الصاوي، في 2012 كان ليا حفلة كبيرة وأنا بغني "الثورة مستمرة" وقفت وماقولتش اللفظ، فالجمهور قالها والساقية عملت مشكلة.

طب ما الشتيمة ممكن تقلل جمهور الراب؟

في ناس بتقدم الراب، من غير شتيمة ممكن يسمعوه، وده من وجهة نظري "راب كيوت".

بس مش مفروض إن الفن بيساعد على تنمية المجتمع؟

التنمية مهمة الحكومة، مش شغلانة الفنان، وأنا بقدم فكرة بطريقتي من خلال الفن ده، صحيح في أغاني ليا فيها ألفاظ خارجه، بس ده اللي أنا حاسه، لأن في حاجات كتير مستفزة، وعن إن الفنان قدوة أنا شايف إن دي مثاليات، مبحبهاش، ودايما بقول للناس محدش ياخدني قدوة.

استمع إلى صباح الخير يا مصر 

في مشكلة حصلت بينك وبين رابرز تانيين؟

في ناس فهمت الموضوع غلط، وفهموا إن الراب هو إني أشتم حد، وفعلا حصلت بيني وبين ناس في إسكندرية مشكلة، ومن هنا اتحطت قاعدة بتقول: "لو عايز تبقى رابر اطلع أشتم إم سي أمين"، ومن 2011، فجأة بقى الراب فن ثوري وكل الناس بتشارك وممكن تكون الناس ما بتنزلش أصلا بس هو قدام المايك وحش، وده معجبنيش، فحوشت كده شوية ناس بيكرهوني.

شايف اعتزال فنانين كتير مؤخرا إزاي؟

أنا مش عارف هما مؤثرين فعلا ولا لأ، بمعنى في ناس بتبطل عشان هو خلاص مبقاش عنده حاجه يقولها، وواحد تاني ممكن يبقى الموضوع مش بيجيب له فلوس، وفي ناس بتعتزل على سبيل الدعاية عشان ناس تدخل تقولهم "والنبي خليك".

الجمهور بره مصر مختلف؟

جدا، بره الناس فاهمة الراب، ومش بينافق، يعني لو بغني كويس يقدروني، ولو بغني مش تمام ممكن يرمونا بالبيض و الطماطم، ولما بره بيعرفوا إن في رابر جاي من مصر، بيجوا عشان يسمعوه رغم إنهم مش فاهمين الكلام، إنما هنا لغاية النهارده أهو وإحنا في 2015، لما بطلع في لقاء تليفزيوني بلاقي الناس بتسألني إيه هو الراب أصلا، ومحدش بيكلف نفسه ويقرا فيسألني عن وعي عن اللي أنا بعمله.

شاهد إم سي أمين في فرنسا 

إمتي إتقال عليك إم سي؟

ده اسم الشهرة بتاعي من ساعة ما كنت بعمل شات من زمان، ودلوقتي كل الناس بقيت إم سي، ولما أديت نفسي لقب تاني زي "الجنرال" لاقيت كل الناس برضه بقيت جنرالات، واللي لفت نظري للقب كان قصي خضر الرابر السعودي، واستوحيناها من كليب "الجنرال" اللي بطله جاي لمهمة بعينها عشان يعملها.

هل في ألبومات قريب لـ إم سي أمين؟

حالياً عندي 4 ألبومات، ومنهم ألبوم مزيكا فقط، وألبوم عن القضايا الاجتماعية، وألبوم لـ"عرب ليج"، وألبوم أخير هينزل خلال شهر، نتاج رشة عملناها بنقدم من خلاله 30 رابر من مصر، وبنغني معاهم فيه، وبندور دلوقتي على مكان عشان نعمل فيه حفل إطلاق الألبوم.

وأسباب عطلة الألبوم، إني في كل مرة كنت بخلصه وبعدين أرميه ع النت، لأن في أغاني بكتبها وانا متأثر بأحداث بعينها، وأغاني تانية تعيش، فبسجل وأرفع ع النت، أما الأغاني اللي بتعيش فبستني عليها وأسيبها، فبدور على شركة توزيع عشان أنزل ألبومي الخاص.

استمع لـ مهرجان الراب المصري 

في ناس سألت ليه إم سي أمين يغني مع سادات وفيفتي؟

قبل ما أعرف الشباب كنت سمعتهم، واللي عرفنا عليهم ناس فرنساويين، فقعدنا إتكلمنا طلع ابن بلد جدا، وبقيا كلنا أصحاب، والمعرفة كانت ترتيب لحفلة في فرنسا، قعدنا يومين كلنا، وبعد ما خلص موضوع فرنسا بدأنا نتقابل، وطلعنا مهرجان اسمه "الراب المصري" من تاني يوم كان في الشارع، وتراك تاني كان معانا فيه "فيلو"، والسبب الأساسي اللي خلاني أشتغل معاهم إنهم أصحابي وإنهم فعلا بيقدموا حاجه بيحبوها، والهجوم عليهم زيادة أوي، وده أنا أكتر واحد أحس به لأني بتهاجم من زمان.

هل في حفلة قريب لـ "عرب ليج"؟

إن شاء الله في عندنا حفلة في مهرجان الكوكب، يوم الخميس 26 مارس، الساعة 7، عايزين نشوف كل الناس، ياريت تنورونا.