الهدايا والورد مرتبطة في أذهان معظم الرجال الشرقيين بالمناسبات الرسمية والأعياد فقط، وأصبح الرجل الذي يهادي زوجته بدون أي مناسبة "كائن ينتمي لكوكب آخر".

الرجال المصريون أصبح أغلبهم يعتقدون أن "كيلو كفتة" أفضل وأهم من الورد، باعتبار أنهم "كبروا على الرومانسية والكلام ده"، وهو ما يجعل زوجاتهم يتحسرون و"يحقدون" على كل زوجة يهاديها زوجها ولو ب"2 جنيه فل"، مثلما خرجت هند صبري عن شعورها صارخة في وجه زوجها "الراحل خالد صالح" في فيلم "أحلى الأوقات" قائلة "عايزة ورد يا إبراهيم".

وهو ما قرر أن يفعله المستخدم الذي لم يذكر أسمه، وأرسل قصته إلى الصفحة المناسبة التي ألهمته بالمفاجأة، وهي صفحة "فاجىء زوجتك"، على موقع التواصل الاجتماعي "فيس بوك"، الذي أوضح أن الفكرة جاءته عندما أخبرته زوجته: "مرة واحد قرر يعمل مفاجأة لزوجته وفعلا جابلها ورد وشيكولاتة وحطها على كنبة العربية اللي ورا، ولما نزلوا العربية قالها معلش مدي إيدك جيبي المناديل من الكنبة، وكانت المفاجأة"، مشيرا إلى أن زميلات زوجته رددوا "مين يعمل كده؟ ودي قصة خيالية، وتقريبا هي الغرض من القصة إن الكلام ده مبيحصلش يعني"، ما جعله يقرر أن يجعل الحلم حقيقة.

وسرد المستخدم تفاصيل ما حدث، قائلا: "اتفقت معاها إننا نخرج ناكل برة، وأصريت لأنه لو منزلتش من البيت مش هعرف أعمل المفاجأة، روحت اشتريت ورد مجفف ريحته حلوة، وبوكية ورد حلو، وعلبة شيكولاتة من النوع اللي بتحبه، وفضيت شنطة العربية كلها، ومليتها بالورد المجفف، وحطيت البوكية وعلبة الشيكولاتة مع ورقة عليها كلمة (بحبك)، وفضلت أفكر هو أنا إزاي أساسا هخليها تفتح الشنطة! طيب الراجل قالها هاتي المناديل، أعمل أنا إيه بقا؟!، قلت خلاص، هخليها تجيب المناديل من الشنطة برضه".

وأضاف الزوج: "وقبل ما نقرب من العربية جت في دماغي فكرة تانية قلتلها خدي إزازة المية حطيها في شنطة العربية عشان هعدل الجزمة، واستنيت لغاية لما وقفت قدام العربية وبقت في مرمى المفاجأة، رحت فاتح الشنطة من الريموت، زوجتي وقفت قدام العربية متسمرة، الحقيقة أنا كنت خايف متعجبهاش الهدية، أصل أنا خبيت جوة علبة الشيكولاتة خاتم دهب، وهي لسة متعرفش حاجة، أخدت العلبة بتاعة الشيكولاتة جوة العربية بعد المفاجأة الأولى، ولسة بتاخد واحدة شيكولاتة من العلبة لقت الخاتم جواها".

وأختتم رسالته ساخرا: "مش عايز أقولكم وأنا بحاول أفاجئها زي اللي كنت رايح امتحان يا أنجح يا أسقط، الحمد لله عدت بسلام وعجبتها المفاجأة".

وتفاعل المستخدمون، على "البوست"، الذي حاز على إعجاب ومشاركة الآلاف، بينما جاءت ردود فعل الفتيات على أنه "حلم"، "رجل مش موجود في الوجود"، متمنيين لو ان جميع الرجال فعلوا لأزواجهم مثل هذه المفاجأة.