تحدثت ديانا السعيدى، خريجة فنون جميلة قسم ديكور، عن اتجاهها لتصميم قطع ديكور مستوحاة من الحضارة الفرعونية، حيث قالت :" بدأت حياتى المهنية بمساعد مهندس ديكور فى الميديا، سواء فى مسلسلات أو برامج تليفزيونية وإعلانات وفيديو كليب ومهرجانات، لفترة وكنت ضمن مهندسين الديكور اللى شاركوا فى موكب نقل المومياوات الملكية، وعشان بقالى فترة بشتغل فى المتحف القومي للحضارة المصرية، اتأثرت بالفن الفرعونى، لأنى كنت حاسة طول الوقت إنى فى مكان عظيم غنى بآثار أجدادنا الفراعنة اللى قدروا يحققوا أمجاد مش هتحصل تانى، وقدروا يخلوا الناس منبهرة بأعمالهم لحد وقتنا هذا".

صممت ديانا العديد من قطع الديكور المستوحاة من الحضارة الفرعونية و موكب المومياوات بجانب قطع الديكور الحديثة لكن الأخيرة لم تلقى رواجاً بسبب تأثر الناس بإفتتاح طريق الكباش ونقل المومياوات الملكية التى أعادت الأنظار إلى قيمة الحضارة المصرية القديمة، حيث قالت ديانا:"بدأت بعمل ديكور فرعونى وشوفت ناس كتير حبيتها خاصة مع حفل نقل موكب المومياوات الملكية وافتتاح طريق الكباش ساعد فى الإقبال على الديكور الفرعونى وبدأت ناس تطلب منى شغل فرعونى مخصوص، وأكترهم مصريين، وكمان نقل موكب المومياوات الملكية وطريق الكباش، ساعد أكتر على تشجيع حركة السياحة الداخلية".

تواجه ديانا بعض الصعوبات فى عملها والتى تحدثت عنها قائلة :"الصعوبات اللى بقابلها فى شغلى، إن شغل الديكور مش بيظهر بشكل كويس فى الصور اللى بنشرها على السوشيال ميديا، و ده ممكن يتحل لما يكون فيه محل ليا وده للأسف مش هعرف أعمله دلوقتى ".

تحلم ديانا بأن يصبح لها بصمة فى ديكور كل بيت فى المستقبل، حيث قالت :"نفسى يكون عندى مكان فى مول كبير، أقدر أعرض فيه شغلى، لأن ده يساعدنى أوصل فكرتى للناس وأشرح كل قطعة ديكور ببيعها وبحلم أن شغلى يوصل لكل بيت ".

تصميم أخر

تصميم ديانا

قطعة أخرى من تصميم ديانا

ديانا

ديانا السعيدى