نعت الفنانة لوسي، رحيل الفنانة هياتم، التى وافتها المنية اليوم عن عمر ناهز 69 عاما، قائلة، "الله يرحمها كانت لسه صغيرة بس هى متتعزش على اللى خالقها" .

وأضافت: كلمتنى ريم البارودى من أسبوعين بتسألنى على رقم بنت هياتم واديتهولها، ولما اتصلت لقيته مقفول، ولما سألتها فى ايه قالتلى اصل هياتم تعبانة فى المستشفى ومش عارفة أوصلها ولا أعرف هى فين حتى ومحدش عاوز يقول فين".

وأشارت إلى إنها تركت رسالة لها على تطبيق "الواتس اب" وأخبرتها بأنها لوسى ولكنها لم تفتح هاتفها وظل مغلق دائما ومن وقتها لم نتمكن من الوصول إليها، حتى صحيت اليوم وقالى زوجى البقاء لله هياتم توفيت.

وتابعت: احنا كنا جيران وقبل ما أتجوز كانت شقتى فى الهرم وهى كانت فى الدور اللى تحتى، وكنت دايما فى حالى وهو مجرد بنصبح على بعض حتى جمعنا شغل سوا فى مسلسل "الباطنية"، واشتغلنا مع بعض وهى ست على خلق وكانت فى حالها ولا تحتك بأى شخص.

وأستكملت: هياتم فى الحقيقة عكس الأدوار التى كانت تقدمها فى الأفلام والمسلسلات تماما، وعن وصيتها بعدم إقامة عزاء قالت، أنا حتى لما بدخل مستشفى بقولهم لو مت مش عاوزة عزاء، لأنه بيجمع الناس للحزن وسيرة الناس، وتلاوة القرآن أهم من أي حاجة تانية.

واختتمت حديثها، الواحد نفسيته تعبانة من فراق حد جميل زى هياتم وانا بفتكرلها كل خير  لأنها كان لسانها حلو مع كل الناس وشيك ورقيقة ومحترمة ومش بتغلط فى حد وشغلها أهم من اى حاجة وكنا بناكل مع بعض علطول، وياريت اللى يقدر يقرا لها الفاتحة ويطلب لها الرحمة يكون كتر خير وربنا يرحمها ويغفر لها يارب".

كانت الفنانة هياتم قد توفيت منذ قليل عن عمر ناهز 69 عاما بعد صراع قصير مع المرض، حيث اكتشفت الفنانة الكبيرة الراحلة مرضها بإصابتها بسرطان القولون، ودخلت على أثرها العناية المركزة، داخل أحد المستشفيات وبعد عدة أسابيع استقرت إلى حد ما، ليتم نقلها إلى غرفة عادية، لتتطور الحالة المرضية من جديد مساء أمس الخميس، وتدخل العناية المركزة مرة أخرى، لتودع الحياة منذ ساعات قليلة.