إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

متزعلش من الناس اللي حبها ليك سجن.. مسيرهم ياخدوا وقتهم وكراهيتهم ليك تبقى حرية.   

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الاثنين 26/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول متنرفذشي نفسك وانتا بتحاول تفهم حاجة او تشرحها لحد مش عاوز يفهم ومقرر انه ميفهمش الا اللي هو مقتنع بيه.. ممنوش رجا.. خدلك بريك احسن وكبر دماغك وهو هيدور الموضوع ف دماغه وهيجيلك من نفسه.. أي تصرف تاني غير كدة هيبقى تعب على الفاضي.. مزاجك اهم

برج الحمل عملياً

( الشغل والمذاكرة والتخطيط لبكرة ):

صحيا النهاردة انتا محتاج تلعب ضغط وتعد مش اقل من حداشر اتناشر عدة مظبوطين من غير غش خالص.. زي إمبارح بالظبط بس هتعمل دة مرة الصبح ومرة بالليل بقى النهاردة

برج الحمل صحياً

( نفسيا وجسمانيا وكل مايخص طاسة المزاج ):

غذائيا النهاردة تقدر تتجه للمحشي وللرقاق باللحمة المفرومة وللفراخ.. بالهنا على قلبك..

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والمائية والهوائية..

إعرف حظك اليوم برج الثور بالتفصيل الاثنين 26/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

متشغلش نفسك بالدفاع عن نفسك بشكل هجومي طول الوقت على اللي حواليك عشان دة بيفتن ببساطة وبيعتبر أكبر دليل على انك مش واثق ف نفسك وقلقان..

برج الثور عملياً

( الشغل والمذاكرة والتخطيط لبكرة ): 

حاول تبقى هادي النهاردة وراسي وانتا بتقرر اي قرارات ف الجانب العملي من حياتك.. ثم بالراحة ياجدع على نفسك مش كدة.. صحتك أهم والله.

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة انتا زي القرد بدليل انك بترازي ف الناس من تحت لتحت ولا حدش واخد باله..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والبرمائية والهوائية والترابية والنارية..

إعرف حظك اليوم برج الجوزاء بالتفصيل الاثنين 26/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

جايز حد يقولك حاجة النهاردة بسيطة خالص تفتحلك شباك على الحياة من أول وجديد.. جايز مين يعرف.. سيب قوس الاحتمالات مفتوح إحتياطي ومتتكسفش تسأل وتحاول تفهم

برج الجوزاء عملياً 

( الشغل والمذاكرة والتخطيط لبكرة ):

انتا كبير ف نفسك ومحدش يقدر يستقل بيك لمجرد انك تهت مرة او اتنين.. كلنا بنتوه يابرنس.. دة شيئ عادي جدا ف حياة البشر.. ثم كل اللي حواليك دول بيمثلوا الثقة عشان تبقى فاهم.. الكوكب دة مفيهوش حد عارف بكرة شكله ايه اساسا ومع ذلك عايشين ومبسوطين اهو زي مانتا شايف وبياكلوا ويشربوا ويرازوا ف بعض بمنتهى الاخلاص والتفاني لمجرد ان صحتهم حلوة ومساعداهم.. مش أكتر

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة محتاج فرفشة ونعكشة.. تقدر تنكش شعرك على العالم كنوع من انواع الاعتراض براحتك..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والسمكمكية والترابية والنارية..

إعرف حظك اليوم برج السرطان بالتفصيل الاثنين 26/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

معظم الوقت حدسك صح واحساسك ف محله بس خد بالك ان اوقات قراراتك بتبقى مفاجأة وصادمة وغير مبررة اللي حواليك.. كمان حاول متبقاش متطلب طول الوقت وزنان ف الزمكان.. إهدى حبة على روحك مش لازم تتأكد كل يوم ان اصحابك بتحبك وهيفضلوا موجودين ف حياتك.. إهدى ياخويا مش كدة

برج السرطان عملياً 

( الشغل والمذاكرة والتخطيط لبكرة ):

صحتك النهاردة محتاجة أفلام ومسلسلات ومزيكا حلوة ومعمولة حلو مش أي كلام ولا ماين ستريم

برج السرطان صحياً 

(نفسيا وجسمانيا وكل مايخص طاسة المزاج ):

غذائيا النهاردة يفضل الاتجاه للسلطة الخضرا بشكل اساسي وللكول سلو بشكل ثانوي وللشيش طاووك او للكوردون بلو بشكل جانبي

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والكتكوتية والنارية والهوائية والمائية

إعرف حظك اليوم برج الأسد بالتفصيل الاثنين 26/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تبسط الامور على نفسك حبة ومتصدرش كرامتك طول الوقت قبل اي حاجة عشان كدة هتخسر ف الناس واحد ورا التاني بدون اي داعي.. حتى لو مش محتاجهم برضة وجودهم بيفرق ف مودك وحياتك كلها متقدرش تنكر دة

برج الأسد عملياً 

( الشغل والمذاكرة والتخطيط لبكرة ):

متعملش اي حاجة ف شعرك اليومين دول عشان العكوسات كتير وفي كهربا ف الجو وانتا مش ناقص كهربا

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة متألقة ماشاء الله وجميل وممكن تتنطط بجمالك على الكوكب كله الليلة.. براحتك ف الموضوع دة جدا

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والكرِيبّية والنارية والهوائية..

إعرف حظك اليوم برج العذراء بالتفصيل الاثنين 26/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

كلم اللي بتحبه وصالحه بلاش كلام فاضي.. مش مهم مين صح فيكم ولا مين غلط الحياة بتجري والايام بتطير.. معقول هتضيع الوقت كله ف الخناق.. والله دة يبقى عيب.. عيب كبير كمان سواء ف حقك أو ف حق الحياة..

برج العذراء عملياً 

( الشغل والمذاكرة والتخطيط لبكرة ):

اعتمد على المجهود الجماعي حبة وشارك الناس ف اللي نفسك تعمله جايز يساعدوك بدل مانتا واخد جنب كدة ومفهم نفسك انك فتك ف كل حاجة ومش محتاج حد يساعدك.. خليك قريب حبة يمكن تفلح.. خليك قريب.

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس ممكن تكون افضل لو اقبلت على الحياة حبة ولو اهتميت تاكل الاكل اللي بتحبه..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والهوائية والترابية والبرمائية..

إعرف حظك اليوم برج الميزان بالتفصيل الاثنين 26/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتفكر تعمل حاجة مجنونة جدا ودي حاجة مش جديدة عليك..

برج الميزان عملياً 

( الشغل والمذاكرة والتخطيط لبكرة ):

كلنا عارفين انك بحالات وطول الوقت حيران ترازي نفسك بس مش كدة.. حبة هدوء وإستقرار عشان التعالب اللي بتجري ورا ارانب ف خيالك دي تهدى وتتهد حبة.. حبة هدوء وإسترخاء..كمان شاكك ف نفسك طول الوقت ليه؟.. محتاج حد يحلفلك انك هتنجح ف حياتك ولا ايه؟.

برج الميزان صحياً 

( نفسيا وجسمانيا وكل مايخص طاسة المزاج ):

صحتك كويسة بس دماغك بترازيك بشدة اليومين دول.. حاول تفتكر انك انتا اللي سايقها على فكرة.. مش العكس.. انتا قوي بجد بس مبترضاش تعترف بالموضوع دة رغم انك عارفه كويس ومجربه برضة كويس قوي.. انتا بس اللي بتنسى كام مرة وقعت وقومت نفضت هدومك وكملت عادي جدا ولا كأن في حاجة حصلت.. انتا بس اللي بتنسى..

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والبربئية والنارية والترابية والمائية والهوائية..

إعرف حظك اليوم برج العقرب بالتفصيل الاثنين 26/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خد بالك عشان قلبك ممكن ينده عليك على بالليل.. اوعى تطنشه ليرازيك ف أحلامك

برج العقرب عملياً 

( الشغل والمذاكرة والتخطيط لبكرة ):

التكنولوجيا النهاردة صاحبتك جدا وهتوصلك لكل حاجة انتا عاوزها.. استغل الفرصة صح وبتمكن يامعلم

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة فل وفي نشاط كامن لو اتوظف صح ممكن تخرب بيه الدنيا.. حاول متنجرفش بس ف اي معارك كلامية مع اي حد ميستاهلش لمجرد انه نجح ف استفزازك.. لا ضغطك ولا اعصابك هيستحملوا خناق النهاردة وهتتنكد.. ف على ايه.. كبر دماغك احسن.. صحتك ومزاجك بالدنيا اساسا

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والكهربائية والبرطمانية والكهرمانية والبرمائية والترابية والهوائية والنارية..

إعرف حظك اليوم برج القوس بالتفصيل الاثنين 26/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اهتم بحبايبك اليومين دول ومتخليش زحمة الشغل تنسيك تدلعهم من وقت للتاني ولو بكلمة حلوة طول اليوم.. الكلمة الحلوة الصافية اوقات بتبقى حياة ف حد ذاتها للي بيحبك..

برج القوس عملياً 

( الشغل والمذاكرة والتخطيط لبكرة ):

ركز جدا اليومين دول وداري علي أفكارك كويس جدا.. ولا تبالي لأي طاقات هدامة حواليك.. ركز عشان هتتألق قريب إن شاء الله.. ركز يابرنس.

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها وكويسة ولو اهتميت وريحت ف نص اليوم حبة من التفكير ومن الحركة هتبقى احسن واروق بالتأكيد.. أهم حاجة تخليك واعي وقوي ومتحكم ومتسرحش ورا اي افكار سلبية او شريرة خالص الليلة.. بلاش

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والهوائية والنارية..

إعرف حظك اليوم برج الجدي بالتفصيل الاثنين 26/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تخرج حبة من الضلمة للنور جوة دماغك وف خيالك.. محتاج تحرر من القيود المجتمعية اللي بيفرضها عليك اهتمامك بالبرستيج والمظهر والوضع الاجتماعي..

برج الجدي عملياً 

( الشغل والمذاكرة والتخطيط لبكرة ):

عمليا كل حاجة ماشية.. جايز بصعوبة بس ماشية ودة جميل بس بشوية اهتمام ومجهود هيبقى اجمل واحسن طبعا مفيش كلام.. كمان انتا محتاج تبطل تبقى حيطة مايلة انا اسف لأي حد من اللي حواليك.. انتا زيك زيهم محتاج اللي يهتم بيك ويراعيك.. مينفعش تيجي علي نفسك طول الوقت كدة.. دة مش صح ياكابتن.

برج الجدي صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة نور وسينما وخروج وفرفشة مش شكوى ونكشة شعر وفركشة..

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والكشرية والترابية والنارية..

إعرف حظك اليوم برج الدلو بالتفصيل الاثنين 26/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

آن الآوان تظهر وتبان يامعلم.. ان الآوان تهتم حبة بمشاعرك بشكل لطيف وخفيف ومفيهوش كلام كبير معقد ولا نفسيات مضلمة.. آن الآوان.. اتمنى تتصرف صح

برج الدلو عملياً 

( الشغل والمذاكرة والتخطيط لبكرة ):

القمر ف صفك النهاردة خد بالك.. متكسلش بزيادة وإهتم حبة بكل فرصة تظهرلك الليلة.. إحتمال كبير جدا تخش ف مشروع ما ناجح.. اسمع وانصت كويس بس لكل التفاصيل وبلاش حماسة مبالغ فيها من اللي بيعقبها علاطول جملة " ايه اللي انا عملته ف نفسي دة".. مهم تقتنع وجدا قبل ما تتفق على اي حاجة تخص المستقبل ومهم تبص للفايدة المادية اللي جاية بعدين.. اما نشوف هتعمل ايه.. اما نشوف

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم بتتحسن ف حاجات وحاجات تانية بتظهر ودة غالبا تاعبك ومحسسك باليآس حبة خصوصا وانك مبتحبش الادوية ولا سيرة العيا اساسا.. مهم تكمل بنفس الاهتمام لحد ماتخف خالص.. مهم والله.. على الاقل لنفسيتك مش لجسمك وصحتك بس

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والكتكوتية والبرمائية والكبريتية والجنية والمائية..

إعرف حظك اليوم برج الحوت بالتفصيل الاثنين 26/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

جميل النهاردة وكيوت والقمر لو شافك إحتمال كبير يعاكسك بالليل

برج الحوت عملياً 

( الشغل والمذاكرة والتخطيط لبكرة ):

إرمي التليفون النهاردة وإخرج اتمشى وشم هوا واتفرج على الناس وكفاية خنقة وحبسة.. انتا محتاج براح واسع ومحتاج حد يفهمك بجد مش حد يمثل انه بيفهمك عشان له مصلحة.. متسيبش حد يستغلك.. انتا أوعى من كدة بمراحل

برج الحوت صحياً 

( نفسيا وجسمانيا وكل مايخص طاسة المزاج ):

صحيا انتا كويس وتمام بس ياريت تتحرك حبة زيادة وبنشاط ونفس مقبلة على الحياة.. بلاش إكتئاب الله يباركلك ف صحتك ومزاجك.. بلاش

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والهوائية