إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

في ناس أندرويد وناس ويندوز وناس ماك وناس ماك برو وناس لينكس وناس يونيكس وناس بي أو إس وناس أم إس إكس وناس أميجا وناس سيجا وناس سيمبيان وناس صن أو إس وناس ويندوز تلاتة حداشر وناس أتاري.. وناس نادرة جدا جدا أيريكس.   

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الأحد 25/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

الحب مفيهوش بلطجة على فكرة.. ولا فيه حق مكتسب.. انتا فاهم غلط غالبا.. الحاجات دي من اكتر الحاجات ممكن تقتل حب بين اتنين اساسا..

برج الحمل عملياً

( الشغل والمذاكرة والتخطيط لبكرة ):

ذكائك الفظيع وجاذبيتك المغناطيسية الشنيعة بيخلوك دايما محط انظار معظم الناس اللي بتفهم وبتقدر ف البشر بشكل عام.. ناقصك بس تتعلم ازاي تبقى حنين.. على الاقل مع اللي بيحبوك وبتحبهم.. مش تبقى ف حياتهم عامل زي سواق التوك توك المشاكس اللي طول الوقت عاوز يخطف دخلة عكس.

برج الحمل صحياً

( نفسيا وجسمانيا وكل مايخص طاسة المزاج ):

صحيا النهاردة انتا محتاج تلعب ضغط وتعد مش اقل من حداشر اتناشر عدة مظبوطين من غير غش خالص..

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والنارية والمائية والهوائية..

إعرف حظك اليوم برج الثور بالتفصيل الأحد 25/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

محتاج دلع النهاردة ومكالمة حلوة من حد بسيط وحلو ومش عاوز منك اي مصلحة من اي نوع..

برج الثور عملياً

( الشغل والمذاكرة والتخطيط لبكرة ): 

اللي مش عاجبه ادائك ف الحياة او ف تفاصيل الحياة يكتب شكوى ويطلع يديها لمدام عفاف ف الدور الرابع ويخلي باله من السلمة المكسورة عشان الاسانسير غالبا بايظ او ممكن ينفجر بيه وهو طالع يشتكيك.. قال يشتكيك قال.. دانتا كميل.. هو انتا في زيك برضة.

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة انتا تمام باستثناء شوية بواخة ف الجيوب الانفية عابرة ان شاء الله ومش هتقعد كتير.. تجنب زحمة البشر والعربيات والتراب بس مش اكتر..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والبرمائية والمائية والهوائية والترابية..

إعرف حظك اليوم برج الجوزاء بالتفصيل الأحد 25/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج مساحة خضرا واسعة جدا ف خيالك تتنطط فيها وتزقطط وتبني مباني من الشيكولاتة والكيكة والربسوس وتهدها على دماغ اي حد يفكر يعض ف اي حيطة من حيطان المباني دي..

برج الجوزاء عملياً 

( الشغل والمذاكرة والتخطيط لبكرة ):

تقلباتك المودية المزاجية هتخلي اليوم عامل النهاردة زي المهلبية.. ذنب العالم ايه ف كونك مش عارف انتا عاوز ايه بالظبط وبتسعى للفت الانتباه طول الوقت وبس؟.. حاول متعتمدش على حب الناس ليك ولجمالك شخصيتك اكتر من كدة.. ممكن ييجي وقت ورصيدك دة من الحب عنهم يخلص وفجأة.. صحصح وخد بالك.

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة تقدر تسقي جسمك ف البانيو ف مية سخنة وشاور جيل ومعطرات على الاقل ساعة ومش اكتر من ساعة ونص..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والسمكمكية والهوائية والترابية والنارية..

إعرف حظك اليوم برج السرطان بالتفصيل الأحد 25/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مكسوف تحب وتتحب.. ياحيزن الحيزن ياسواد السواد.. يوم حزين دة ف تاريخ الكون ويستاهل تقفله دقيقة حداد على قلبك اللي مات من كتر حطته ف التلاجة.. اه والله..

برج السرطان عملياً 

( الشغل والمذاكرة والتخطيط لبكرة ):

جايز تتضطر تتحط ف مواجهة النهاردة انتا بتحاول تتجنبها بقالك فترة.. رتب افكارك وخليك واثق ف نفسك ومتحاربش عشان تطلع صح بالعافية وخلاص لمجرد انك مبتحبش تطلع غلط.. مش مهم.. المهم الصح يتعمل وبس.

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة محتاجة خيال وسرحان ف احلام اليقظة ومحتاجة فلوس برضة عشان دي الحاجة الوحيدة اللي بتعدل النفسية ف ثانية.. ودي حاجة معروفة ف كل الاوساط الطبية والغير طبية..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والكتكوتية والترابية والنارية والمائية..

إعرف حظك اليوم برج الأسد بالتفصيل الأحد 25/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متخليش جمالك وذكائك يعزلك عن الناس يافتّك يا قوّر ياناصح ياللي بتفهمها وهي طايرة..

برج الأسد عملياً 

( الشغل والمذاكرة والتخطيط لبكرة ):

برنس ف نفسك النهاردة بجد.. شوف لما غزالتك بتبقى رايقة وبتركز ف حالك بتفلح ازاي وبتنجز ف امورك وبتنجح وبتتفهم صح.. يارب علاطول ياخويا والله.

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها بس حاول تنام بدري عشان مناعتك متعملش معاك الدنيئة فجأة وتاخد برد ولا حاجة بعد الشر عليك من البرد..

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والهوائية والنارية والترابية والهوائية..

إعرف حظك اليوم برج العذراء بالتفصيل الأحد 25/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تتحمس حبة للحياة الله يباركلك ولو بالتمثيل وكفاية برود عشان متخسرش اكتر مانتا بتخسر اساسا ف الحياة..

برج العذراء عملياً 

( الشغل والمذاكرة والتخطيط لبكرة ):

شوف اللي وراك من سكات النهاردة ومتشغلش بالك بحد.. وحاول متغلش ف روحك النهاردة وناقش مشاكلك بوضوح وصراحة وبهدوء أحسن.

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها ومزاجك برضة ف المعقول.. واضح انك محتاج فيلم حلو ومزيكا حلوة وخروجة حلوة مع حد احلى.. جايز.. مين يعرف..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والنارية والهوائية والمائية والبرمائية..

إعرف حظك اليوم برج الميزان بالتفصيل الأحد 25/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متوقعش نفسك بنفسك ف شباك العنكبوت وترجع تصوت وتلم عليك الناس بدون داعي.. خليك حذر بتدي مشاعرك لمين كويس اوي اليومين دول بليز وبلاش تهور او تصرفات دافعها الحقيقي مش الحب قد ماهو النبهار اللحظي والهروب من الوحدة والبرستيچ الأو?ر قدام الناس بفرحة وتنطيط الارتباط اللي كله ف الاساس إعتباط تحت الباط..

برج الميزان عملياً 

( الشغل والمذاكرة والتخطيط لبكرة ):

مكتوم ومكبوت وحاس انك هتطق وهتفرقع من كتر مانتا محتاج تشتكي وتتشحتف بقالك حبة.. طب ما تمسك نفسك كدة احسن وتتماسك وتجمد وتعدي الحاجات بدون ما تفكر فيها كتير وتعذب نفسك بتفاصيلها.. ايه اللي هيجرى يعني.. ولا هو لازم العالم كله يحس بمشكلتك ويعيط عليك ومعاك.. ماتجمد كدة امال.

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة زي الفل بس نفسيا انتا مرمي ف حفرة سودة كلها تفكير مرير خصوصا بالليل.. قوم اشغل وقتك واعمل شاي ولا اي نشاط مفيد ومنعش قوم وبلاش نكد العالم مش ناقصك والله قوم..

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والترابية والنارية والهوائية..

إعرف حظك اليوم برج العقرب بالتفصيل الأحد 25/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

معجب بحد من تحت لتحت وخلاص مش قادر على روحك وهتموت وتروح تقوله.. طب اتقل يوم كدة ولا حاجة جايز دة اعجاب وحماسة عابرة مش أكتر.. اتقل لحد ما تتأكد على الاقل وبعد كدة ابقى اعمل اللي يريحك بمزاجك مفيش ازمة..

برج العقرب عملياً 

( الشغل والمذاكرة والتخطيط لبكرة ):

عاقل وجميل ونايس جدا النهاردة ليه.. مالك حاسس انك غلبان ومظلوم كدة ليه؟.. في ايه بالظبط.. مين ضايقك للدرجة دي اساسا ولا انتا تعبت من كتر المناهدة ولا عيان ولا فيه ايه بالظبط طمنا عليك.

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك تنكش شعرك على العالم ولو ساعة على الاقل وقت الغروب..

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والكهربائية والبرطمانية والكهرمانية والبرمائية والهوائية والنارية..

إعرف حظك اليوم برج القوس بالتفصيل الأحد 25/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتتحب حب عادي من اكتر من شخص بيكراشوا عليك بس انتا مصر ومقرر ومنشن تتحب من شخص واحد بس مستحيل متفهمش ليه.. جايز انتا بتحب الحاجات الصعبة.. او جايز بتحب تعيش متشحتف كدة طول العمر وخلاص.. عموما انتا حر.. قلبك وانتا حر فيه.. تغسله تنشره تكويه..

برج القوس عملياً 

( الشغل والمذاكرة والتخطيط لبكرة ):

مش لازم ترد على كل كلمة بتتقالك.. مش لازم تخش حرب مفتوحة ضد كل واحد انتا حاسس انه بيهدد امانك الشخصي او مصلحته بتتعارض مع مصلحتك.. مش لازم تضيع وقتك ف كل الكلام دة اساسا.. وراك حاجات اهم والله من كل المعارك الكلامية دي،

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة تمام بس خد بالك من اكلك ونوعيته وتنوعه بشكل صحي اكتر من كدة ومتاكلش طبيخ وتخش تنام وترجعه تشتكي من الكوابيس.. بلاش

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والهوائية والمائية والهوائية والترابية..

إعرف حظك اليوم برج الجدي بالتفصيل الأحد 25/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

دفي قلبك قبل جسمك النهاردة كويس عشان في عواصف رومانسية قادمة ف الطريق ياكابتن..

برج الجدي عملياً 

( الشغل والمذاكرة والتخطيط لبكرة ):

بتستحمل كتير جدا جدا وبتكتم ف نفسك طول الوقت ومبتشتكيش.. طب وبعدين طيب.. إمتى هتعيش حبة لنفسك وعلى مزاجك.

برج الجدي صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية فرفشة ونعنشة مش أكتر..

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والكشرية والترابية والهوائية والنارية..

إعرف حظك اليوم برج الدلو بالتفصيل الأحد 25/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

وماله لما تبقى كسول وملكش مزاج تعمل اي حاجة.. ايه يعني اللي هيحصل.. هو اللي مكانوش كسالى عملوا ايه ف الحياة يعني بالظبط غير شوية فلوس وامراض وعقد.. مش عيب توفر طاقتك للحاجة اللي تستاهلها وبس.. مش عيب ابدا تقرر لنفسك ومتبقاش نسخة مكررة من اي حد تاني متقررله مسبقا يعمل ايه ويقول ايه وميقولش ايه.. خليك نفسك ومع نفسك وبس عشان انتا متعرفش تبقى اي حاجة تانية ولا حد تاني الا نفسك.. نفسك وبس..

برج الدلو عملياً 

( الشغل والمذاكرة والتخطيط لبكرة ):

مش مطلوب منك تيجي علي نفسك عشان ترضي اي حد حواليك ولا صح اساسا انك تبقى حيطة مايلة يتسند عليها كل واحد عنده هم ولا مشكلة ومعتبرك ملجأ للفضفضة وبس.. إهتم بنفسك حبة يابيه.. وإهتم بمزاجك ومصلحتك حبتين.

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم محتاجة منك تفرح عشان في حاجات بتخف وتزعل عشان في حاجات تانية بتبوظ.. المهم انك على الطريق الصح.. مش اكتر.. ومع شوية صبر ومثابرة وإصرار هتخف خالص وهتبقى زي الفل ان شاء الله.

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والكتكوتية والبرمائية والكبريتية والترابية والجنية والهوائية..

إعرف حظك اليوم برج الحوت بالتفصيل الأحد 25/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج اجازة من التفكير الكتير ومحتاج تحس بحب حقيقي مش مجرد مصلحة مغلفة بحب شكله شيك بس ف واقع الامر بلاستك مالوش اي لازمة ولا فيه اي إحساس أو أمان

برج الحوت عملياً 

( الشغل والمذاكرة والتخطيط لبكرة ):

مشتت نفسك ف اكتر من حاجة ومهموم اوي تثبت للعالم انك ناجح وجامد وذكي وجميل ومثالي.. قولنا مليون مرة بطل حكاية المثالية دي خالص احنا مجرد بشر.. لا اكتر ولا اقل.. وخد بالك حبة من شعرك النهاردة ومن ودانك ورموش عينيك..

برج الحوت صحياً 

( نفسيا وجسمانيا وكل مايخص طاسة المزاج ):

صحيا انتا زي القرد بس ناقصك بس شوية نية صافية وحاجة توجهلها كل طاقتك وتكون مستاهلة ومستحقة لمثل هذه الطاقة اساسا.. مش مجرد حفرة ف بحر..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والترابية والنارية والهوائية.