وجهت الفنانة الشابة سارة عبد الرحمن، إحدى بطلات مسلسل "سابع جار" التي تجسد شخصية "هبة"، رسالة خاصة، لمتابعيها وجمهورها بمناسبة عيد ميلادها الـ30. 

وكتبت "سارة"، عبر حسابها الخاص على موقع "الفيس بوك"، قائلة: "من يومين عرفت، أن عندي شغل يوم عيد ميلادي واتضايقت وصعبت عليا نفسي وعيطت،عشان كنت هاعمل لنفسي عيد ميلاد لأول مرة بجد و كدة، وأصلا خايفة عشان دخول الـ30 ده مش سهل ومخيف".

وأضافت: "أكيد بالذات أن السنة اللي فاتت، دي كانت صعبة ومليانة مطبات.. بعدها نمت وصحيت لقيت نفسي عادي كنت جعانة بس شوية و قولت الحمدلله، أصلا إني هاقضي عيد ميلادي ده بأعمل اللي أنا بحبه مع الناس اللي بحبها واتعودت عليها.. و بدأ عيد ميلادي ليلة رأس السنة الساعة 12 أحلى بداية، باكل بيتزا و باتناقش مع علي السعودي في علاقة فيلم كيلينج اوف سيكريد دير بالمسرحيات الاغريقية".

وتابعت: "اليوم كمل في الهادي وبعدها بكام ساعة روحت نمت استعدادا ليوم شغل.. صحيت لقيت ماما جتلي و جايبلالي هدية و براونيز و جت معايا الشغل!!!، يعني باتحايل عليها بقالي كتير و كانت حاجة حلوة جدا أنها تيجي أخيرا، بعد كدة جالي هدية من الاسيستانت الفشيخ المحترم وبعدها بشوية جابلي سينابون.. يعني خلاص أصلا عايزة أيه اكتر من كدة".

وأشارت: "وبعد يوم شغل 16 ساعة و مشاهد صعبة و متعبة.. خلاص اخر شوط بقي قوم هوب دبل كيك الناس في التصوير اصلا فركشت و فهموني ان لسا فيه شغل و كلهم استنوا و دخلوا عليا ب تورتة و شمع كتير و يعني اساسا الناس مابتصدق تروح و قعدوا و كان عندي احساس انه مش عشان التورتة.. تأثرت جدا جدا جدا و لسا متأثرة.. كلت تورتة و بعد كدة اتعزمت على شيشة و حمص الشام في البرد القارص.. روحت البيت لقيت هدية عالباب من سارة مسلم.. كراستين جلدهم خشب و كل صور ال ?يچوال چورنال بتاع 2017 مطبوعة!!! ايه المجهود دة!؟ ازاي اصلا؟؟". 

واختتمت، كلامها قائلة: "أنا مبسوطة جدا جدا جدا و متأثرة بكل حاجة جدا.. ومش مصدقة أن اليوم دة حصل فيه كدة وإني دخلت الـ30 بهذا الكم من الحب و المفاجآت و الدفء (الدنيا لسا برد برضه ماغيرتش رأيي)، بس ماعنديش حاجة اقولها غير شكرا أوي أوي وأنا محظوظة بالناس اللي حواليا وأتمني اعرف اعمل لكم حاجات فشيخة كدة زي مانتم عملتولي".

يذكر أن "سابع جار" يتكون من 60 حلقة، وتدور أحداثه بشكل أساسي داخل إحدى البنايات السكنية في منطقة المعادي، ليرصد حكايات وأسرار ومشاكل خلف الأبواب المغلقة وهو من بطولة دلال عبد العزيز، وأسامة عباس، وهاني عادل، ورحمة حسن، وسارة عبد الرحمن، ومحمد علاء، ودعاء حجازي، وصفاء جلال، وهو من تأليف هبة يسري، التي تشارك في الإخراج مع كل من آيتن أمين ونادين خان.

اقرأ أيضًا...