إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

"كانت تظن انه قديس.. وكان ايضا يظن انها بتفهم ف الرجالة..ياللا حصل خير"..قصة قصيرة جدا

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الخميس 2/11/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

مبتحبش تعتمد على اي حد او تحتاج لأي حد.. عندك إستعداد تمر بأي حروب او ظروف وحشة وتعديها وتسكت مهما اتوجعت لمجرد انك تبقى ف نظر نفسك مستقل ومعتمد على نفسك حتى لو هتقضيها بلقمة ناشفة وطبق مش.. ولا هيفرق معاك طالما انتا مش مذلول لأي حد.

برج الحمل عملياً

( الشغل والمذاكرة والتخطيط لبكرة ):

محتاج شيكولاتة كتير وبشكل عاجل..

برج الحمل صحياً

( نفسيا وجسمانيا وكل مايخص طاسة المزاج ):

صحتك كويسة بس انتا غالبا واخد دور برد واهمك انك تعبان ومش عارف تتنفس..متقلقش هتخف قريب وهتبقى ألسطة وميت فل وأربعتاشر..

إعرف توافق برج الحمل مع باقي الأبراج النهاردة:

متوافق مع الابراج الغازية والكشكولية..

إعرف حظك اليوم برج الثور الخميس 2/11/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

مبتخافش سهولة من أي حاجة وبتعرف تبتسم ف وش الخطر وتتنح عليه كمان رغم انك بتداري خوف رهيب من انك تفقد الثقة ف نفسك ف أي لحظة بشكل مفاجئ..الخوف دة ف حد ذاته هو اللي بيتسببلك أوقات كتير جدا وبشكل أساسي ف فقدانك للثقة ف نفسك بالشكل المفاجئ المباغت اللي انتا اساسا بتخاف منه.. الإحساس دة بيوجعك حتى ف أحلامك.

برج الثور عملياً

( الشغل والمذاكرة والتخطيط لبكرة ): 

ابعد عن اللون الازرق ف اي حاجة النهاردة وابعد برضة عن اي حد صوته مسرسع حتى لو كان انتا..

برج الثور صحياً 

( نفسيا وجسمانيا وكل مايخص طاسة المزاج ):

نفسيا انتا محتاج تبطل تقول لأ على كل حاجة حتى لنفسك ف المراية وغذائيا انتا محتاج تفطر كويس ويكون ف الفطار دة فول مضروب ف الخلاط وبطاطس وبتنجان بتوم وفلفل مقلي..بلاش طعمية الا ف حالة الضرورة القصوى..

إعرف توافق برج الثور مع باقي الأبراج النهاردة:

متوافق مع الابراج الفرفورية والحنكوشية..

إعرف حظك اليوم برج الجوزاء الخميس 2/11/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

أكبر مخاوفك انك تحس انك مش كافي..مش مالي مكانك.. سواء ف حياتك او ف حياة الناس اللي حواليك.. الإحساس دة كفيل يخليك تفضل تقعد لوحدك ومتتعاملش مع أي حد.. كمان بيبقى احيان كتيرة جدا سبب برضة لقلبتك المفاجئة على الناس وعلى نفسك ف المراية كل فترة.

برج الجوزاء عملياً 

( الشغل والمذاكرة والتخطيط لبكرة ):

اليوم جميل ومنعش وخصوصا لو صحيت من بدري وخلصت كل اللي وراك بحيث تقدر تتطمن انك ممكن تقعد باقي اليوم متعملش اي حاجة وانتا واثق ان مفيش حد ممكن يطلب منك اي حاجة..بس دة طعا محض خيال وإبقى قابلني لو حصل..

برج الجوزاء صحياً 

( نفسيا وجسمانيا وكل مايخص طاسة المزاج ):

نفسيا انتا محتاج تتفرج على درة وهو بيتشوي وغذائيا انتا محتاج تاكل الدرة اللي اتفرجت عليها وهي بتتشوي..بالهنا علي قلبك..

تعرف على توافق برج الجوزاء مع باقي الأبراج النهاردة:

متوافق مع الابراج النارية والبللورية..

إعرف حظك اليوم برج السرطان الخميس 2/11/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حساس بزيادة وبتهري وتنكت ف نفسك طول الوقت بسبب وبدون سبب..كمان بتكره اي حد بيعمد لإنه يحسسك انك قليل ومبتحبش اي حد برضة مبيقدركش التقدير الكافي اللي انتا شايف انك مستحق ليه ف خيالك وبتعتبره جزء لا يتجزء من قيمتك وركن من اركان الإيجو بتاعك..كل دة طبيعي يخليك تاخد كل حاجة بتحصلك على كرامتك بسبب وبدون سبب.

برج السرطان عملياً 

( الشغل والمذاكرة والتخطيط لبكرة ):

لسة في بقايا من المود العنيف ف نفسيتك..جايز انتا متوتر وجايز خايف وجايز زهقان مش اكتر عشان كدة مودك قالب على حالة هجومية عنيفة..جايز..مين يعرف..والأهم..مين يهتم..

برج السرطان صحياً 

(نفسيا وجسمانيا وكل مايخص طاسة المزاج ):

نفسيا انتا محتاج تمارس رياضة او تعمل اي حاجة تتسحل فيها وتنغمس بحيث تعرف تطلع الغل اللي جواك فيها وف تفاصيلها براحتك ومن غير ما تآذي حد سواء بالفعل او بالكلام..

تعرف على توافق برج السرطان مع باقي الأبراج النهاردة:

متوافق مع الابراج السوبيائية والهوائية والحللولية..

إعرف حظك اليوم برج الأسد الخميس 2/11/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عندك فوبيا قوية جواك من انه ييجي عليك وقت وتبقى وحيد ومفيش حد بيعبرك..ومحدش هيحبك.. جايز عشان كدة بتبادر وبتسبق انتا وتمشي وبتصد محاولات اي حد فاكر نفسه جدير بإنه يبقى متواجد ف حياتك او قريب منك بشكل حقيقي.

برج الأسد عملياً 

( الشغل والمذاكرة والتخطيط لبكرة ):

اليوم كويس وماشي حاله بس محتاج منك تركز ف تفاصيلك مش ف تفاصيل الناس..إشغل نفسك بالحاجات اللي وراك وبلاش تشغل نفسك بتفاصيل غيرك عشان عيب..

برج الأسد صحياً 

( نفسيا وجسمانيا وكل مايخص طاسة المزاج ):

النفسية محتاجة قعدة على قهوة بسيطة ولطيفة ورخيصة..كمان بلاش تاخد كلام الناس على صدرك النهاردة خصوصا وانك انتا اللي بتبتدي بالصدام معاهم دايما وبترجع تزعل..ف على ايه..خليك نايس وكيوت أحسن..

تعرف على توافق برج الأسد مع باقي الأبراج النهاردة:

متوافق مع الابراج النارية والسرسوبية..

إعرف حظك اليوم برج العذراء الخميس 2/11/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

انتا حد مختلف عن باقي الناس جدا من جواك بس معظم الناس مبتاخدش بالها من الموضوع دة..ودة مبيثيرش جواك اي شعرة مضايقة.. بالعكس.. انتا مبتحبش وبتتجنب وبتخاف فعلا من اللي بيفهمك صح.. بيحسسك انه معاه الكتالوج بتاعك..طبيعي تتضايق.. خصوصا وانتا بتحاول تقنع نفسك طول الوقت انك غامض وملكش كتالوج.. ف حين انك ابسط من البساطة ذات نفسها.

برج العذراء عملياً 

( الشغل والمذاكرة والتخطيط لبكرة ):

بتدعي الطيبة والهدوء ف حين انك مشغول بإنتقاد اللي حواليك طول الوقت وليك دايما تعليق خفي على ابسط تصرفاتهم كأنك مشرف عام او اتش ار على البشر واحنا منعرفش..

برج العذراء صحياً 

( نفسيا وجسمانيا وكل مايخص طاسة المزاج ):

صحتك بتيجي على المرازية ف الناس بشكل كبير جدا..إبقى خليها تنفعك لما تلاقي نفسك قاعد لوحدك..غذائيا انتا محتاج تاكل كباب وريش..

تعرف على توافق برج العذراء مع باقي الأبراج النهاردة:

متوافق مع الابراج الكتكوتية والمائية..

إعرف حظك اليوم برج الميزان الخميس 2/11/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتستحمل حاجات كتيرة جدا وبتيجي على نفسك عشان خاطر اللي بتحبهم وعشان خاطر تحافظ على إحساسك انك محبوب ومطلوب وجميل..مشكلتك انك مبتحبش حد يتكلم عليك وانتا مش موجود بس مش أكتر..الإحساس دة بيجننك وبيخليك تعمل تصرفات كتير خارج طبيعتك وبتدخلك ف دايرة الندم طول الوقت..عشان مبتحبش حد يشرحك او يفسرك مش عشان بس هيبقى ظالم ومتجني عليك.. انما عشان انتا نفسك لسة مش فاهم نفسك بشكل كامل.. طبيعي متقبلش بفتي أي حد عليك أو عنك.

برج الميزان عملياً 

( الشغل والمذاكرة والتخطيط لبكرة ):

اليوم محتاج نشاط وإهتمام بالمظهر ومحتاج برضة تطلع من دماغك كل الافكار السودة اللي بتلعب جوة مخك من بالليل..

برج الميزان صحياً 

( نفسيا وجسمانيا وكل مايخص طاسة المزاج ):

طول مانتا بعيد عن الأو?رثينكينج بالمشوار هتبقى كويس ومن الشطار..غذائيا انتا محتاج تدلع نفسك ف أكلة حلوة من الأكلات اللي انتا بتحبها..حاول بس ميكونش فيها ملح كتير او شطة..

تعرف على توافق برج الميزان مع باقي الأبراج النهاردة:

متوافق مع الابراج الترابية والمائية..

إعرف حظك اليوم برج العقرب الخميس 2/11/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مبتحبش حد يحسسك انك ضعيف او مهمش.. مبتحبش برضة أي حد بيحسسك بالغباء او بيهين ذكائك بتصرفات او كلام حتى لو على سبيل الهزار.. ودة بيخليك عدواني جدا أحيانا وبيخسرك كتير ف المطلق.. والخسارة دي مع الوقت بتخليك تحس بالذنب وبتحاول ساعتها تعدل مع الناس كلها وفجأة بتبقى رقيق جدا وطيب جدا.. ومحدش بيصدقك لما بتعمل كدة للأسف جدا جدا برضة.

برج العقرب عملياً 

( الشغل والمذاكرة والتخطيط لبكرة ):

اليوم ماشي حاله ويمكن يكون لطيف ف حالة واحدة بس.. لو صحيت من النوم بتضحك ومبسوط..اما لو قومت مكشر ومش طايق حد ف مفيش أمل..حاول تزقطط بقى وبلاش نكد..

برج العقرب صحياً 

( نفسيا وجسمانيا وكل مايخص طاسة المزاج ):

نفسيا انتا كويس ومستقر بس مش آوي ودة غالبا راجع لإنك مهتم تاخد حاجات من الحياة دلوقتي وحالا ومش قادر تستنى او تصبر او تمثل حتى انك مطنش..

تعرف على توافق برج العقرب مع باقي الأبراج النهاردة:

متوافق مع الابراج المائية والنارية..

إعرف حظك اليوم برج القوس الخميس 2/11/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتخاف الناس تنساك او تهملك او تديك وضع اقل من قيمتك ف الحياة.. جايز عشان كدة بتحاول تبقى إجتماعي ومحبوب ومهم على قد ماتقدر ف حياة اي حد تعرفه..بإختصار انتا مبتحبش تمر ف الحياة مرور الكرام.. دة فعلا بيضايقك.

برج القوس عملياً 

( الشغل والمذاكرة والتخطيط لبكرة ):

اليوم محتاج خروج ومن بدري ومحتاج تتواجد ف وسط مساحة خضرا كبيرة زي جنينة او حاجة شبهها كدة..مهم كمان النهاردة تركز ف اللي بيحبك زي ماهو مركز فيك ومعاك..

برج القوس صحياً 

( نفسيا وجسمانيا وكل مايخص طاسة المزاج ):

النفسية مستحية حبة النهاردة ومكسوفة من الحياة رغم انك بتحاول قدر الإمكان تتظاهر بالعكس..غذائيا انتا محتاج تغطس ف ملوخية وفراخ ورز بشعرية..وخد بالك ان الرز الابيض اللي من غير شعرية ممكن يعملك عكوسات كتير انتا ف غنى عنها..

تعرف على توافق برج القوس مع باقي الأبراج النهاردة:

متوافق مع الابراج اللولبية والنارية زي إمبارح..

إعرف حظك اليوم برج الجدي الخميس 2/11/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتخاف الناس تكتشف قد ايه انتا حساس ورقيق من جواك.. بتخاف يعرفوا قد ايه انتا بتهتم ليهم ولكلامهم ولبرستيجك قدامهم..بتحس ان دة لو إتكشف هيتحول لنقطة ضعف كبيرة جدا ف حياتك..دة بيخليك اوقات عنيف بشكل غير مبرر أو منطقي.. كمان انتا مبتحبش حد يتعامل معاك على اساس انك بني آدم عادي.. العادية دي برضة ف نظرك ضعف..وانتا شايف نفسك سوبرمان.. أو على الأقل بتحب تحسس نفسك الإحساس دة كنوع من انواع الديفنس ميكانيزم ضد مرازية الحياة المفاجئة عشان نفسك ف مناعة ضد مصايب الحياة.. ودة للأسف أمر مستحيل.

برج الجدي عملياً 

( الشغل والمذاكرة والتخطيط لبكرة ):

يوم لطيف على كافة الأنحاء النفسية والعملية والعاطفية مع إحتمال سقوط امطار من شوربة الكوارع وقت الغروب كدة..إستعد من بدري بطبق بلاستك فاضي إحتياطي بقى عشان تنبسط..

برج الجدي صحياً 

( نفسيا وجسمانيا وكل مايخص طاسة المزاج ):

حاول مترازيش صحتك اكتر من كدة..مهم تحسن من نفسيتك عشان مرتبطة ارتباط وثيق النهاردة بصحتك بشكل عام..مناعتك محتاجة شوية تفاؤل يامعلم..

تعرف على توافق برج الجدي مع باقي الأبراج النهاردة:

متوافق مع الابراج الهوائية والحلزونية..

إعرف حظك اليوم برج الدلو الخميس 2/11/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتخاف تترفض..بتخاف تثق ف الناس عشان انتا عارف من جواك انك مش هتتحمل إحساس الغدر اللي بتحسه لما يقلبوا عليك فجأة.. وانتا مبتحبش المفاجأة..مبتحبهاش فعلا.. جايز عشان كدة في ناس كتير جدا بتتهمك بالتناكة والتعالي وحب الوحدة بشكل مفرط.. كمان انتا دايما مشغول انك تسيب علامة على وش الحضارة الإنسانية.. ودة حلم كبير وواسع وفضفاض ومحبط للأسف.

برج الدلو عملياً 

( الشغل والمذاكرة والتخطيط لبكرة ):

يوم حلو وجميل خصوصا لو قعدت ف البيت النهاردة ومروحتش ف حتة الا للأماكن اللي بتحتوي على بشر بتفهم ف الناس وتعرف تقدر قيمتك كويس وكمان بيفهموا هزارك..

برج الدلو صحياً 

( نفسيا وجسمانيا وكل مايخص طاسة المزاج ):

إبعد عن اللحوم النهاردة وركز ف الكرفس والجزر والعصاير الفريش وروق على حالك ودندش وإنتعش وإستعد عشان انتا داخل على مرحلة كلها لمعان وزهزة وجمال وتألق..إستمتع..

تعرف على توافق برج الدلو مع باقي الأبراج النهاردة:

متوافق مع الابراج الحنجورية والحبشتكانية..

إعرف حظك اليوم برج الحوت الخميس 2/11/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتخاف تتركن علي الرف..بتخاف تبقى مضمون بالنسبة للي قدامك.. بتحس انه لما دة يحصل مش هيديك اهمية وهيطنشك ويقلبك ويشوف غيرك..ودة بيخليك ترازي ف كل الناس طول الوقت..ف اللي بتحبهم واللي مبتحبهمش مرازية حقيقية طول الوقت عشان تفضل طول الوقت ف بالهم وف خيالهم..شاغل تفكيرهم..ومبتاخدش بالك انهم مع الوقت ممكن يكرهوك ويبعدوا عنك بعد المصلحة ماتخلص..واي مصلحة مسيرها بتخلص مهما طال الوقت للأسف.

برج الحوت عملياً 

( الشغل والمذاكرة والتخطيط لبكرة ):

يوم لطيف على المستوى العملي وخفيف على المستوى العاطفي ومتوتر ومرهق على المستوى الجسماني ومسبك ومليان صلصة وقوطة علي المستوى الغذائي..

برج الحوت صحياً 

( نفسيا وجسمانيا وكل مايخص طاسة المزاج ):

كل حاجة تمام بس محتاج تخليك النهاردة ف حالك حبة وبلاش نكش ف البشر غير لو هتقول لحد انك بتحبه..غير كدة متتكلمش مع حد ايا كان الا لو لمصلحة طارئة مؤقتة عابرة..

تعرف على توافق برج الحوت مع باقي الأبراج النهاردة:

متوافق مع الابراج الترابية والحنكوشية..