روى نائب رئيس مجلس إدارة النادي الأهلي السابق، الكابتن محمود الخطيب، الشهير بـ"بيبو"، العديد من المواقف الطريفة التي وقعت له، له سواء مع والده أو جمهوره، خلال حواره مع الإعلامية إسعاد يونس، في برنامجها "صاحبة السعادة" عبر شاشة سي بي سي، مساء الإثنين.

وقال  بيبو: "في أحد الأيام، اشترى والدي بطيختين، وتركهما عند البياع الذي يبعد عن منزلنا كيلومترين تقريبا، وعندما وصل والدي المنزل قالي لي يا محمود خد أخوك وروحوا هاتوا البطيختين.. فقررت أروح أجيبهم من غير أخويا، علشان أفرّح أبويا.. وفعلا رحت وخدت البطيختين وماشي بيهم، لقيتهم تقال عليا، ومش قادر أكمل السكة".

وتابع: "رحت واقف في نصف الطريق وحفرت حفرة في التراب، ودفنت واحدة وخدت التانية وروّحت.. ورجعت أجيب البطيخة اللى دفنتها مالقيتهاش.. وكأن كان فيه واحد مراقبني، ومستنيني أمشي علشان ياخدها..روحت لوالدتي حكيت لها الموقف، قالت لي: حط البطيخة اللي جبتها تحت السرير واسكت، وأنا هتصرف مع أبوك".

أما عن المواقف التي لا ينساها مع جمهوره، موقف سائق الأتوبيس، الذي قال الخطيب عنه: "هناك مشجع لا أنساه اسمه أبوالمعاطي، صوته القوي في التشجيع كان مميزا لنا كلاعبين، كان يعمل سائقا لحافلة بالنقل العام، يوما كنت أجلس في بيتي متأثرا بالإصابة فوجدته تحت منزلي بالأتوبيس، كان جاي يطمّن عليا بعد ما رجلي اتكسرت.. والفكرة كلها إنه كان جاي بركاب الأتوبيس .. فلقيته طلع سلّم عليا هو والركاب .. لحد ما واحد من الركاب قاله كفاية كده ياعم عشان هنتأخّر".