إبراهيم الصغير : الحلاقة عندى تأشيرة التألق فى الدورى
الثلاثاء، 12 فبراير 2019 01:03 م
بدأت شهرة إبراهيم الصغير أو كما هو متعارف عليه "حلاق النجوم" تزداد في الآونة الأخيرة مع حرص نجوم الكرة علي الظهور بشكل جديد داخل الملعب، خاصة في المناسبات الكروية المهمة التي يحرص خلالها اللاعبين علي تغيير قصة شعرهم لتتناسب مع تلك المناسبة.
ويري الصغير من واقع قربه من اللاعبين أن قصة الشعر تساهم في رفع الروح المعنوية للاعبين وترفع من حالته المزاجية بشكل عام، وتكون دافع كبير علي التألق.
بداية.. كيف بدأن علاقتك بنجوم الكرة والفن؟
علاقتي بدأت مع نجوم الكرة بحكم عملي معهم حتي وصلت إلي ما هو فيه، وبدأ صيتي يظهر خلال فترة بدايات باسم مرسي وأحمد الشناوي وأحمد دويدار مع الزمالك وكذلك عمرو جمال مع الأهلي، ووليد سليمان وتريزيجيه.
من أكثر لاعب صديقك؟
لاعبين كثيرين في الفترة الحالية مثل حازم إمام وباسم مرسي وعمرو جمال وإسلام جمال وفرجتنسي ساسي وحميد أحداد وحمدي النقاز وطارق حامد ووليد سليمان.
من اللاعب الذي لم تكن تصدق أنك تحلق شعره؟
اللاعب اللي مكنتش مصدق نفسي وأنا بحلق له هو الحضري لأني كنت بشجعه وأنا صغير ولم أكن أعتقد أن يأتي يوما من ايام وأقوم معه بعمل وأتولي قص شعره، ودي كنت مستغربها، وعلاقتي بحراس المرمي جيدة جنش وأحمد الشناوي.
من هو أكثر لاعب يتعبك في الحلاقة؟
أكثر لاعبين هما حميد أحداد وإسلام جمال، الأول لأنه دائما مستعجل والثاني لأنه طلباته كثيرة لأنه دائما ما يطلب أن يكون مظهره الخارجي لافت للغاية ويبقي "قمور"، وقد أنفذ له قصة جيدة ولكنه يطلب تغييرها، وصراحة لا أفهمه لأنه بيتعبني زي ما هو تاعب الناس كلها.
أغرب قصات الشعر التي نفذتها؟
أغرب قصات الشعر أيام ما كنا بنعمل لباسم مرسي الأوان وكنت أقوم له بصبغ شعره بألوان مختلفة، ولما عملت له قصة شعر الضفيرة، والناس خدتها باستغراب.
ما رأيك في ردة الفعل التي حدثت علي قصة باسم مرسي وهل أثرت عليك بالسلب إم بالإيجاب؟
الردود كانت إيجابية ولكن السلبية بالنسبة للناس اللي مكنش بيعجبها اللي احنا بنعمله، ولكن القصة عملتلي انتشار حلو وادتني شهرة.
باسم تعرض لمواقف كثيرة بسبب تركيزه في قصات شعره.. ما رأيك؟
قصة الشعر ليس لها علاقة بالمستوي ولا تؤثر علي أدائه داخل الملعب، وعايز أثبت ده بأداء فرجاني ساسي وهو كتألق جدا وكذلك وليد سليمان وأخيرا عمر خربين حريص علي الحلاقة عندي وهو متألق أيضا.
هل عمر خربين أحد المنضمين لقائمة النجوم الذين يحلقون عندك؟
بالتأكيد هو يأتي إلي باستمرار وبهذه المناسبة أحب أشكر محمد مجدي قفشة صديقي اللي بيعملي دعاية كبيرة في بيراميدز وهو اللي جاب خربين يحلق عندي.
هل من الممكن أن ترفض تنفيذ قصة شعر للاعب وتقنعه بقصة جديدة؟
أكيد أتدخل لإقناع لاعب بقصة ما تتناسب مع شكله وتكون لائقة بشكل أكبر عليه، وغالبا ما يقتنع بكلامي ويعجب بقصة الشعر التي أقترحها له.
مين ايده فرطة أكثر من لاعبي الكرة وهل من الأهلي أم الزمالك؟
الاثنين في موضوع الكاديات واحد لأن اللي بطلبه باخده لان ده شغل ولا يوجد فارق بينهما.
هل لإبراهيم الصغير دور في تقريب وجهات النظر بين الأهلاوية والزملكاوية؟
بتيجي عليا فترات بيكون فيها موجود في الصالون لاعبين من الأهلي والزمالك وبيقعدوا ياكلوا ويشربوا ويهزروا مع بعض، وبيبقي فيه حوار حلو جمهور الناديين ما بيبقاش عارف، الاسبوع الي فات كان ساسي ووليد سليمان بيحلقوا مع بعض والاتنين رحبوا ببعض اوي وحيوا بعض بطريقة شديدة، وفيه روح رياضية حلوة والجمهور بيبقي متعصب مش واخد باله من الامور دي.
مَن مِن لاعبي الأهلي والزمالك أصدقاء بواقع قربك منهم؟
بنسبة كبيرة كهربا صديق صالح جمعة جدا وهناك لاعبين كتير بنسبة 90% ولسه جنش وطارق حامد صورة لمحمد هاني بيهنوه علي عيد ميلاده وعلي ما اعتقد الجمهور عارف زي كده، وهما علاقتهم ببعض كويسة وخصوصا لما بيبقي في ما هي أغرب صداقة بين لاعبين من الأهلي والزمالك لم تتخيل أنهما أصدقاء؟
الجماهير في وقت من الأوقات كان رمضان صبحي وحازم إمام حاسة ان العلاقة ما بينهم متوترة بعد أزمة الخناقة بينهما في مباراة القمة الشهيرة، ورمضان صبحي راح فرح حازم إمام لما اتجوز وانا كنت حاضر الفرح وشاهد علي الواقعة دي، والناس واخدة انهم بيكرهوا بعض وبيتعاملوا مع بعض باحترام جدا.
مين اللاعب اللي نفسك تحلقله؟
حاليا في مصر لا يوجد لاعب لأني حلقت للعيبة كلها حتي اللاعبين المحترفين وحتي النجوم السابقين كنت بتمني أحلق لمحمد بركات كان نفسي اقابله واحلق له وبالفعل حلقت له، واكيد الناس بتتابع شغلي مع ساسي والنقاز وخالد بوطيب كذلك أول ما وقع.
بس بوطيب لا يوجد به شعر يحتاج حلاقة؟
بيحلق لان اللعيبة بتتفائل والناس بتقولك اللعيب اللي يوقع للزمالك لازم يروح يحلق عند ابراهيم الصغير.
من كلامك تري أن إبراهيم الصغير بداية التألق؟
انا جزء من التألق لاني بغير مود اللعيبة، لأن اللاعب لما بينزل اللاعب بشكل حلو اكيد هيديله انطباع حلو ، وانا تواجدت في معسكر مباراة الزمالك وبيراميدز وغالبية اللاعبين بيبقوا عايزين يحلقوا عشان يظهروا بشكل حلو، مثلا مباراة الزمالك والنجوم جه صلاح أمين حلق وهو من الناس القريبة وبعض لاعبي الزمالك.
بس صلاح امين كان متعود يسجل في شباك الزمالك وهذه المرة لم يحدث بعد قص شعره عندك؟
هو ماجابش فلوس عشان ليا عليه فلوس ، في ماتش قلتله هتجيب جونين، وقالي لو حصل هديك 1000 جنيه وبعد ما سجل الجونين مشفتش منه حاجة وعشان كده ربنا مش هيكرمه .
كم مرة حلقت للاعبين داخل المعسكرات؟
كنت اتواجد بشكل كبير داخل المعسكرات ولكن حاليا غالبية اللاعبين بيجولي الصالون هنا الا لو فيه معسكرات وبيقعدوا وقت كتير.
ما هي انطباعاتك عن اللاعبين داخل المعسكرات؟
بيكون فيه تركيز عالي اوي خصوصا لو كان ماتش مهم، ولما اروح لفريق بيبقي تركيز مهم وبيكون ليا من ساعة ونص لساعتين بحاول اخلص فيه الحلاقة المطلوبة مني.
تواجدت في معسكر مباراة الزمالك وبيراميدز ما هي الأجواء التي شعرت بها؟
حسيت انه ماتش اوروبي لقيت فيه تركيز عمري في حياتي ما شفته ولعلمك بيراميدز عمل حالة كويسة في الدوري المصري ، اللعبة مركزة وحاسة انه فيه مباراة هتاخد مشاهدة عالية جدا.
هل من الممكن أن تصاحب لاعبين "صلع" مثل وائل جمعة مثلا؟
لا لانه مش هيضيفلي ومش هيأكلني عيش وهتبقي علاقتي بيه قليلة لانه مش هيجيلي.. أي حد اقرع ببعد عنه.
من الذي يدل اللاعبين الأجانب عليك؟
اولا ربنا بيكرمني في الحتة دي وبعد كده عن طريق زملائي من باقي اللاعبين يعني ساسي والنقاز شافوني عن طريق السوشيال ميديا وطلبوا من جنش اللي كلمني وقالي عايزين يجولك عشان تحلقلهم.
وهل لاعبي الأهلي الأجانب بيجولك؟
أزارو جالي مرة قبل كده وحلقتل له بس الاكتر لاعبي الزمالك بحكم الموقع ولقرب الصالون من نادي الزمالك.
مين النجم العالمي اللي نفسك تحلقله؟
انا بعشق رونالدو وبطلت اشجع ريال مدردي بسببه ونفسي احلق له وانا ماشي في الخطوات دي لان هو صديق شخصي لأحمد أبو هشيمة واتمني ييجي مصر واحلقاه بالترتيب مع ابو هشيمة.
اكتر لاعب اجنبي قريب منك؟
فرجاني ساسي بعشقه جدا ومحترم اوي وهو لاعب محترف وبحب عقليته.
مين اللاعب اللي الناس شايفاه مغرور وهو طيب علي المستوي الشخصي؟
حازم امام الناش شايفاه دايما متنرفز وعصبي بس هو في الحققيقة طيب جدا وكذلك باسم مرسي الناس فاكراه مغرور بس هو انسان عادي جدا وطيب.
هل تتدخل لتوجيه النصيحة للاعبين؟
طبعاانا ساعات برجع لاعبين لانديتها وبنصحهم ما يسيبواش النادي وبقولهم بلاش تسيب النادي بتاعك حتي لو جايله فلوس اكتر، وفيه لعيبة توسطت عشان ترجع انديتها وتتحل مشاكلهم.
كيف كانت بدايتك؟
من صغري وأنا لدي طموح أن أصبح شخصا معروفا وبدأت في أسرة متوسطة الحال وكان عندي حافز لازم احسن من كستواي واكون سند لوالدي ووالدتي عشان كنا اسرة كبيرة، وبدأت وانا صغير فادتني لما كبرت.
اول مرتب كنت بتاخدك كان كام؟
اول اجر كنت باخد جنيه ونص وكنت بشتغل صبي حلاق لحد ما ربنا كرمين ووصلت للمكانة اللي انا فيها، وأصعب وقت عدي عليا لما ايدي تكسرت وحسيت الدنيا اسودت في وشي لاني كان لازم اقعد 4 شهور في البيت، وكان نفسي اعمل اسم كبير وده اللي عملته واللي نفسي احققه اني اكبر الاسم ده اكتر.
