عرض الإعلامي محمد نشأت، خلال تقديمه لحلقة اليوم الخميس، من برنامج "أنا مصر"، تقريرا مصورا عن دار لرعاية المسنين المشردين، بمدينة السادس من أكتوبر، أنشئه المهندس محمود وحيد، والتقى نشأت مع عدد من المقيمين داخل الدار، وتحدثوا عن معاناتهم ومأساتهم.

وقال صاحب دار الرعاية، محمود وحيد، خلال البرنامج الذي يعرض عبر شاشات التليفزيون المصري، مساء الخميس: "قابلتني حالة في الشارع كانت محتاج يتنقل لمستشفى ضروري، واتصدمت لما عرفت إن المستشفيات مش بترضى تستقبل المشردين".

وأضاف: "أول ما طلبت الإسعاف رفضوا إنهم يشيلوه غير لما أضمنه وأسيب بطاقتي، وتوجهت بعدها لأقرب مستشفى حكومي ليا، وهي مستشفى الزهور بمدينة نصر، ورفضوا إنهم يتعاملوا معاه، وروحت مستشفى القصر العيني، وقالوا إنه لازم يتنقل مكان تاني ومش هينفع يتحجز في القصر العيني".

وتابع: "بعدها تواصلت مع دكتور في مستشفى أم المصريين، ودخلت الحالة بضمانتي الشخصية وضمانة الدكتور، وبعد العملية تعافى، واتصدمنا أنه مفيش دور مسنين بتقبل الحالات دي، لحد ما لاقيت دار استثماري في مدينة نصر وافقت تستقبله بعد ما أقريت بأني مسؤول مسؤولية كاملة نظير 3 آلاف جنيه إقامة وأكل، و3 آلاف جنيه تانية مستلزمات طبية ومتابعة مع طبيب".

واختتم: "ومن هنا ابتدت الفكرة إني أعمل مكان للناس المشردة يعيشوا فيه بطريقة مناسبة ليهم، واتبعت القانون والإجراءات القانونية وعملت جمعية للمسنين، ووزارة التضامن الاجتماعي حولتني على المديرية، ودخلت قسم الأسرة والطفل، لغاية ما نجحت وعملت دار للمسنين المشردين".