"نهاية حلم".. أغنية من طلاب الجامعة الألمانية لـ"يارا نجم"
الأربعاء، 11 مارس 2015 12:08 م
نشرت الصفحة الرسمية لطلاب الجامعة الألمانية بالقاهرة، أغنية أهدوها إلي روح زميلتهم يارا طارق نجم، الطالبة بالفرقة الأولى بكلية الهندسة، والتي لقيت مصرعها، الاثنين الماضي، إثر تعرضها للدهس بواسطة أحد الأتوبيسات التابعة للجامعة.
وكتب الطلاب على الأغنية التى حملت اسم "نهاية حلم" : "إهداء ليارا طارق نجم، اللى ماتت ضحية للإهمال فى الجامعة الألمانية، دى قصتها، الله يرحمها".
وكانت كلمات الأغنية كما يلي:_
بنت جميلة عندها, حوالى 19 سنة
كان كل أملها إنها, تنجح و تحقق حلمها
إجتهدت دخلت هندسة, فرحت قلب أهلها
خدت أول خطوة فى طريقها بقت فخورة بنفسها
أهلها إشتركولها فى باص الجامعة عشان أمان
بس مهما حاولوا قدرها مكتوب من زمان
باص راجع مش مدى للبشر أى إهتمام
أصلنا فى بلد أرخص ما فيها دم الإنسان
واقفة مبتسمة مش عارفة إنها نهاية قصتها
و نهاية كل الأحلام اللى بعقلها بنيتها
خبطها جامد بضهره وسط صحابها موتها
و بإهماله حط آخر نقطة فى قصة حياتها
عقارب الساعة وقفت, بنزول دم على الأرض
ملامح الصدمة إترسمت, على وش كل فرد
بحيرة دم عمالة تكبر مع كل لحظة تعدى
و طبعاً الإسعاف عمرها ما بتوصل بدرى
لو ماتت إنسانيتى وجودكوا فى الدنيا السبب
حط نفسك مكان أهلها, هتعرف ليه الكره إتولد
بقينا مجتمع مريض ضميره معدوم للأبد
و لو سكتنا عن حقنا هيموت مننا أكبر عدد
لو ماتت إنسانيتى وجودكوا فى الدنيا السبب
حط نفسك مكان أهلها, هتعرف ليه الكره إتولد
بقينا مجتمع مريض ضميره معدوم للأبد
و لو سكتنا عن حقنا هيموت مننا أكبر عدد
سواق أعمى النظر ماسكه مسؤول أعمى القلب
مشاعره من حجر, ولا عمره فك كرب
ضميرك مش هيصحى غير لو دورك كان الأب
فى سيناريو الموت اللى نهايته رافضة تتكتب
هتفضلى فى بالنا, مستحيل حد ينساكى
صورتك محفورة فى قلوبنا لحد ما نلقاكى
حقك مش هنسيبه مهما حصل إوعى تخافى
أنت فى مكان أحسن ياريتنا إحنا كنا معاكى
مفيش فى إيدينا غير إننا ندعيلك بالرحمة
و ندعى على كل واحد كان سبب فى جراحنا
أنت فاكر إنك تقدر تهرب من المحاسبة؟
حساب ربنا مش زى حساب دنيتنا الفانية
كسرت فينا حاجة مستحيل إنها تتصلح
بعد اللى قولته مقتنع إنك لسة الأصلح؟
مش فارق معاك دمنا و مش فارق كلامنا
خليك فاكر إن إهمالك كان سبب ألمنا
لو ماتت إنسانيتى وجودكوا فى الدنيا السبب
حط نفسك مكان أهلها, هتعرف ليه الكره إتولد
بقينا مجتمع مريض ضميره معدوم للأبد
و لو سكتنا عن حقنا هيموت مننا أكبر عدد
لو ماتت إنسانيتى وجودكوا فى الدنيا السبب
حط نفسك مكان أهلها, هتعرف ليه الكره إتولد
بقينا مجتمع مريض ضميره معدوم للأبد
و لو سكتنا عن حقنا هيموت مننا أكبر عدد
