ناس كتير من اللي بتتفرج على المصارعة فاكرة إن أندرتيكر وكين إخوات.. وده غلط خالص.

هما ولا إخوات من الأب ولا من الأم ولا من أي حتة تانية.

أندرتيكر اسمه الحقيقي Mark William Calaway.. وكين اسمه الحقيقي Glenn Thomas Jacobs.

الاتنين قريبين سنًا من بعض.. يعني كين عنده 50 سنة وأندرتيكر عنده 52 سنة.

سنة 1997 كانت بداية فريق تشكيل "إخوة الدمار" أو زي ما ناس كتير عارفاه باسم Brothers of Destruction.

كانت البداية لما أندرتيكر كسب بطولة الـ WWF سنة 1997.. وبعد كده المساعد السابق بتاعه باول بيرر حاول يرجعله مرة تانية.. بس أندرتيكر رفض فده خلى باول يهاجمه مع مان كايند عدو أندرتيكر اللدود في الفترة دي.

طبعًا أندرتيكر مسكتش.. فردلهم الجميل وهاجمهم هو في عرض من عروض Raw.. وحرق وش باول بيرر.

في حلقة بعد كده من حلقات Raw.. باول طلع مرة تانية وعلى وشه آثار الحروق بتاعة أندرتيكر.. وهدد بفضح سر أندرتيكر اللي محدش يعرفه.

باول كمّل وقال إن السر ده كان.. لما أندرتيكر كان صغير.. باول كان على علاقة بوالدة أندرتيكر وخلف منها ابن اللي هو أخوه الصغير.. كين.

الكلام ده طبعًا غير صحيح.. وأكبر دليل على كده أن باول بيرر وقت ولادة أندرتيكر كان عنده 11 سنة.. يعني مستحيل يكون كان على علاقة مع والدة أندرتيكر في السن ده ويخلف منها كمان.

طبعًا أندرتيكر خاف على السر بتاعه أنه يتفضح.. فوافق أن باول يرجع يبقى المساعد بتاعه تاني.. وحاول يستحمل مضايقات باول ليه الكتيرة.. بس في مرة مقدرش يستحمل وسابه.

باول مسكتش وقال إن هو مسؤول عن موت أخوه الصغير كين لما ولع في بيتهم وهو صغير - كل الكلام ده محصلش أصلًا وده كان جزء من القصة اللي الـ WWE عاملاها في الوقت ده عشان تأكّد الموضوع مش أكتر - وأندرتيكر طبعًا أنكر الاتهامات دي.

في بطولة Bad Blood سنة 1997 في أول ماتش Hell In A Cell في تاريخ الـ WWE.. كان أندرتيكر بيلاعب شون مايكلز.. الجمهور اتفاجئ بواحد داخل عليهم لابس قناع على وشه وطوله حوالي مترين.. دخل على القفص الحديدي ومسكه من الجنب وكسر القفص.. أيوة كسر القفص ودخل عشان يضرب أندرتيكر وخسّره الماتش.

في الفترة دي كين حاول يطلع كل غضبه وانتقامه ضد أندرتيكر عشان - طبقًا لكلام باول - كان هو السبب في أن وشه يتحرق ويلبس قناع.. وأندرتيكر كان مبيردش الضرب عليه عشان - بردو طبقًا لكلام باول - هو كان وعد أسرته أنه ميضربش أخوه مهما حصل.

في الفترة دي حاول فريق DX المُكون من تريبل إتش وشون مايكلز أنه يضرب أندرتيكر.. بس كين طلع وأنقذه.. وده خلاهم يتحدوا لفترة من الوقت مع بعض.. بس كين انقلب عليه وخسّره ماتش على حزام بطولة الـ WWF ضد شون مايكلز.. ومش بس كده بعد الماتش طلع باول بيرر وبمساعدة كين حط أندرتيكر جوا تابوت وقفلوا عليه وولعوا في التابوت من برا ببنزين.

بعد اللي حصل ده كله.. طبعًا أندرتيكر مسكتش.. وغير رأيه ووافق يلعب ماتش ضد كين في بطولة ريسلمانيا 14 سنة 1998.

واستمرت العداوة بينهم شوية يتصالحوا ويلعبوا مع بعض وشوية يلعبوا ضد بعض لحد آخر ظهور ليهم سوا كان في بطولة سرفايفر سيريس سنة 2015.. لما لعبوا ماتش زوجي ضد براي وايت ولوك هاربر.. وده كان آخر ماتش يلعبوه سوا.

في نوفمبر 2016.. حلقة الـ Smackdown رقم 900 ظهر أندرتيكر وحذر فريق Smackdown اللي كان عنده مباراة في بطولة سرفايفر سيريس ضد فريق Raw.. وفي الوقت اللي أندرتيكر كان نازل من الحلبة الحلقة خلصت بس المشاهدين اللي كانوا هناك قالوا إن كين ظهر ووقف جمب أندرتيكر وعمل معاه حركة الفريق بتاعهم.. ودي كانت آخر مرة يظهروا فيها سوا.. عشان أندرتيكر اعتزل خلاص في ريسلمانيا 2017.