فاكر فيلم Back to the future .. والسفر للمستقبل وانت بتتخيل الدنيا هيبقى شكلها عامل ايه وايه اللي اتغير فيها.. غالبا الفكرة دي مش جديدة.. لأن ناس كتير قبلنا حاولو يعرف الدنيا شكلها أيه بعد 100 سنة من زمنهم.. وطبعا مش كل التخمينات بتطلع صح.. لأن في رسامين عباقرة من فرنسا في القرن ال 19 حاولو يتخيلو الدنيا شكلها إيه في الألفية التالتة.. حاول تمسك نفسك لأن في حاجات في الصور دي مخطرتش لينا احنا على بال لسه.. وأكيد محدش بيعرف يتوقع شكل المستقبل بنفس دقة ستيفن سبيلبيرج في سلسلة Back to the future..

فرنسا القرن ال19 مكنش فيها سينما عشان كدة تخمين القرن ال100 سنة الجاية كان بالنسبالهم مستحيل يبقى في شكل تاني غير صور وكروت مرسومة.. تخيل المطافي الطايرة.. محدش فكر إن فيه طيارة تطفي الحرايق من فوق.. لا المطافي في سنة 2000 طلعت بجناحات.

لو التعليم بالشكل دة كان هيبقى أحسن كتير من التابلت.. نطحن الكتاب من هنا والكهربا تشحن المنهج في دماغ التلميذ من هنا.. ومحدش يحتاج يذاكر ويراجع أصلا.

غالبا اللي فكر في مناهج بتتشحن بالكهربا ومطافي بتطير مفكرش إن احتمال يطلع حاجة اسمها الانترنت.. لأنه  التوقعات كانت بتقول إننا في سنة 2000 لسه هنفضل نستخدم البريد الورق.. لكن ساعي البريد هو اللي بيطير.. يعني هو دة التطوير الوحيد.

مش عارفة إيه التطوير في فكرة التليسكوب هنا غير إنه تقريبا بقى بروجيكتور كمان.. يعني عالم الفلك هيبقى بس مكسل يقوم يبص في العدسة.

رياضة الغوص برضه ليها نصيب من التطوير في سنة 2000 لدرجة إن الغواصين راكبين حصنة بحر ومعاهم سيوف كمان .. ليه معرفش.

الزراعة بقى ممكن تكون شبه نموذج موجود في الحقيقة دلوقتي.. كله بالآلات ومش محتاجين 50 إيد فيها.. كل الحكاية روبوت واحد ويظبط الأرض الزراعية كلها.

التاكسي الطائر.. دي برضه فكرة قربنا نشوفها في العالم في القرن ال21.. لكن طبعا مش بجناحات عصافير زي دي.. بس التاكسي الطائر ظهر في Back to the future .. مع تحيات سبيلبرج.

مش عايزين نكون متشأمين لكن أدوات التجميل اللي شبه مغسلة العربية دي ظهرت سنة 1940 واختفت بعدها بسرعة عشان حجمها كان كبير ومتعبة وعملت حوادث ياما في أمريكا وقتها.. وغالبا مش هترجع تاني.

دة تخمين نجح فعلا وحصل إن المنطاد كان سلاح جوي في الحرب العالمية الأولى.. يعني مش هنشوفه تاني في  أي حرب جديدة لأنه بقى قديم.

أدوات الخياطة تاخد المقاس وتنفذ التنظيم في ساعتها.. المفروض دة يكون ظهر سنة 2000 لكن برضه دلوقتي قربنا على حاجة شبهها شوية وهي الطابعة 3d واللي بتطبع حتى اللبس.. الفكرة دي برضه ظهرت في Back to the future بالمناسبة.

لو عجبك الموضوع دة يامعلم يبقى ميفوتكش دة..

صور | المشروم حلو بره البيتزا برضه