تعرف على حظك اليوم لبرج الميزان مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

حظك اليوم برج الميزان عاطفياً

( الكراش والإكس والبوي والجيرل فريند والجوز والزوجة والقرايب ):

علاقتك مع الطرف الاخر بيشوبها التوتر والقلق اليومين دول عشان انتا خايف من نفسك ومن تقلبات أحاسيسك انتا..مش منه هو..وطبعا انتا مش قادر توضح دة بشكل هادي ميعملش مشكلة او صدام ممكن يكلفك العلاقة كلها وانتا مبتحبش الخسارة.. بالتالي حاول متشغلش بالك اوي بالموضوع دة وسيب كل حاجة على حالها..حاولوا تخرجوا وتجددوا الحب اللي مابينكم بشكل عاقل وناضج شوية وفكك من الحلم الرومانسي الكامل اللي بتحلم دايما بيه عشان دة تطبيقه على ارض الواقع ف الكوكب دة بقى صعب جدا..لازم تقلل حبة من شروطك ف مواجهة زخم الحياة..للأسف لازم تعمل كدة..

حظك اليوم برج الميزان عملياً 

( الشغل والمذاكرة والتخطيط لبكرة ):

ابعد النهاردة عن الغموض والسواد والافكار السلبية.. اليوم مناسب للخروج وللزقططة تحت اي ظروف.. عاند نكد الحياة بالضحك والفرفشة وكل ما الحياة تكشر ف وشك إضحك ف وشها ورازيها وثق ان بكرة افضل وأحسن وأروق.. وأي حد نكدي يحاول يعوق مسيرة الزقططة بأوهامه السلبية دي قوله “بكرة مش ملك حد” وبس..ولا هو جايب نتيجة الحياة من الكنترول وإحنا منعرفش ولا ايه بالظبط.

حظك اليوم برج الميزان صحياً 

( نفسيا وجسمانيا وكل مايخص طاسة المزاج ):

فترة الليل مناسبة للخروج ومناسبة للأكل بشدة برضة..تقدر توازن مابين الحاجتين دول بشكل ميضرش إحتياجك للسهر والتنطيط ف الشارع ف كل حتة ومابين الدايت اللي من الانسب انك تبتدي تعتاد وجوده ف حياتك خصوصا والشتا داخل وجسمك هيعمل معاك ألاعيب كتير عشان يزقك تاكل اكتر من المعتاد..قال ايه عشان تعرف تتدفى..عموما تقدر تركز ف الاكل زي مانتا عاوز بس بلاش صواني او طواجن او محاشي ف فترة المساء والسهرة..خصوصا خصوصا قبل النوم مباشرة..

إعرف توافق برج الميزان مع باقي الأبراج النهاردة

متوافق مع الابراج الحنجورية والكتكوتية

من مشاهير برج الميزان 

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.