زا بانشر بتاع الأفلام vs زا بانشر بتاع المسلسلات.. مين يكسب؟

في مسلسل جديد اسمه the punisher هينزل السنة دي لسه ما اتحددلوش معاد صدور رسمي.. المسلسل ده هيكون سادس مسلسل لشركة مارفل بالتعاون مع شبكة نتفلكس.. المسلسل هيكون عنيف ودموي كعادة مارفل في مسلسلاتها اللي بتحاول تبعد فيها عن الرقة الموجودة في أغلب الأفلام بتاعتها.

أغلبنا أو كتير مننا يعرف شخصية فرانك كاسل من فيلم The Punisher بطولة توماس جين وإنتاج سنة 2004.. بس اللي كتير ميعرفهوش أن الفيلم ده مقارنة بالمسلسل اللي هيصدر السنة دي من بطولة جون بريثنال ولا حاجة.. أيوة زي ما بقولكم كده ولا حاجة خالص..

المسلسل - اللي أغلب النقاد والمصادر توقعوله تاريخ صدور في نوفمبر 2017 - هيكون نقلة في تاريخ مارفل.. خاصة أنه هيكون حوالين ماضي الأليم لفرانك كاسل وإزاي عيلته اتقتلت.. واللي بالمناسبة ليها أكتر من رواية.. يعني في الفيلم اللي من إنتاج سنة 2004.. عيلة فرانك كاسل اتقتلت في فرح على شاطئ على ايد عصابة.. في المسلسل - واللي نقدر نستنتجه من التريلر بتاعه - أن عيلته اتقتلت على ايد المارينز.

مثلًا في الفيلم.. فرانك كاسل كان ظابط في "إف بي آي" بيقوم بعمليات تخفي في العصابات لحد ما يمسك عليهم دليل والشرطة تيجي تقبض عليهم.. في المسلسل - واللي نقدر نستنتجه من التريلر - أن فرانك كاسل ظابط مارينز وهو كان عضو في الفريق اللي قتل مراته قبل ما يخرج منه لسبب مش معروف لسه وبعد كده الفريق ييجي يقتل عيلته.

أحد الفروق الكبيرة بين المسلسل والفيلم.. في الفيلم اللي العصابة قتلتهم كانت عيلة فرانك كلها بمعنى الكلمة.. يعني كان فرح وكل المعازيم ماتوا باباه مامته قرايبه حماه حماته مراته ابنه بنته.. كلهم ماتوا وهو الوحيد اللي نجى.. في المسلسل ظباط المارينز اللي قتلوا عيلته مقتلوش غير مراته وابنه بس اللي هي أسرته يعني عشان مكنش عنده بنت في المسلسل.

والفيديو ده بيبن قد ايه زا بانشر كان إضافة قوية لمسلسل ديرديفل.. في مشهد قتال عظيم بين شخصيتين أسطوريتين.

مننساش بردو أن زا بانشر ظهر في أجزاء من مسلسل Daredevil الجزء التاني.. وهيكون هو نفس البطل اللي في المسلسل.. في الأجزاء دي زا بانشر قدر يورينا جزء بسيط جدًا من قدراته والجمهور أُعجب بيه أكتر من شخصية البطل الرئيسي اللي هو ديرديفل وطالبوا بمسلسل كامل ليه واتعمل فعلًا.. ف تخيلوا بقى لما يكون هو بطل مسلسله الخاص هيبقى عامل إزاي؟!

فرق كمان بين الفيلم والمسلسل.. في الفيلم زا بانشر مكنش ليه أي أصدقاء أو معاونين بالمعنى الأصح.. كل اللي حواليه كانوا أعداء ليه وبيحاولوا يقتلوه إلا بس 3 أصحاب كانوا قاعدين في نفس العمارة اللي هو فيه وحاولوا يضموه ليهم وسابلهم فلوس قبل ما يمشي.. في المسلسل بقى زا بانشر معاه "ميكرو" وده أحد الشخصيات المساعدة لزاا بانشر في الكوميكس وهو خبير في الهاكرز والأسلحة وصمم لزا بانشر أسلحة كتير في حربه ضد العصابات.

كل ده حلو جدًا.. بس ايه يخلينا نتفرج على مسلسل زا بانشر؟ عاوزين حاجة محصلتش؟ خلوني أقولكم أن شخصية زا بانشر واحدة من 3 شخصيات بس في عالم مارفل قدرت تقتل العالم كله.. بمعنى العالم كله بأبطاله بأشراره بكله.. والشخصية الوحيدة من الـ 3 اللي معندهاش أي قدرات خارقة أو قوى محصلتش.. عشان الشخصيتين التانيين كانوا وولفرين وديدبول اللي عندهم أسرع هيلينج فاكتور في الكوميكس.. طبعًا زا بانشر مش هيقتل عالم مارفل في المسلسل بس ده دليل على قوته وعنفه واللي ظهر جزء منهم في ديرديفل.

لو عاوز تقرا حاجات كتير شبه دي.. ممكن تدخل على المواضيع اللي تحت دي.. هتعجبك..

ليه تتفرج على المصارعة مع انها تمثيل؟

حدوتة مصارعة.. من المصارعة للتمثيل.. تفتكر تفرق كتير؟

Marvel ولا DC.. مقارنة بين أشهر شركتين كوميكس