تعرف على حظك اليوم ل برج الجوزاء مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

حظك اليوم برج الجوزاء عاطفياً ( الكراش والإكس والبوي والجيرل فريند والجوز والزوجة والقرايب ):

بتسقي برجليك ف بركة المبالغة ف رد الفعل طول الوقت ليه اليومين دول؟..هترجع تندم وتفضل تنكر انك غلطان لحد ماتقتنع انك فعلا متهور ومتسرع ودايما خناقاتك على حاجات متستاهلش لا لشيئ الا انك محتاج تتحب 

حظك اليوم برج الجوزاء عملياً (الشغل والمذاكرة والتخطيط لبكرة ):

إتحكم ف نفسك وإفتكر انك انتا اللي سايقها مش العكس 

حظك اليوم برج الجوزاء صحياً ( نفسيا وجسمانيا وكل مايخص طاسة المزاج ):

سبانخ مجمدة وكبشة رز وبصل متقطع رفيع وتوم وحبة مكرونة مقصوصة مع بعض ف حلة تيفال مع حبة مية حلوين ومعاهم بابريكا ومعلقة صلصة تتضاف بعد الغلى وتوابل واغرف ف طبق واعصر لمون واستمتع يامعلم وياحبذا لو تحط اي حتت فراخ او لحمة متبقية عندك من اي اكل تاني مع الميكس العجيب دة..هيخليه تحفة طبعا..راعي بس ان الرز يترش فوق السبانخ المجمدة وهي راقدة ف الحلة فوق البصل وتكون المية طايلة الرز دة عشان يستوي..يدوبك طايلاها لأنه محطوط بس عشان يمتزج مع السبانخ ويديها قوام مش اكتر..كمان متنساش تغطي الحلة دي كويس ومتزودش مية بالعبيط..واحدة واحدة ياملواني عشان الطبخة دي لما بتظبط بتظبط المزاج بجد طول اليوم 

إعرف توافق برج الجوزاء مع باقي الأبراج النهاردة

متوافق مع الابراج الهوائية والنارية والمستحية

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.