تعرف على حظك اليوم لبرج الدلو مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

حظك اليوم برج الدلو عاطفياً ( الكراش والإكس والبوي والجيرل فريند والجوز والزوجة والقرايب ):

متتخانقش النهاردة مع حد بتحبه ولا حد مبتحبوش..الخناق ملوش معنى وهيبوظ مودك على الفاضي..الافضل تواجه بهدوء وتواجه الحب بالحب والكره والمرازية ببوسة ف الهوا تحرق دم اي حد قاعد بس متفرغ للشر الرخيص المجاني

حظك اليوم برج الدلو عملياً ( الشغل والمذاكرة والتخطيط لبكرة ):

خليك كبير ف نفسك ومتنزلش لمستوى الصراع على حاجات انتا عارف كويس انها متستاهلش الصراع اصلا

حظك اليوم برج الدلو صحياً ( نفسيا وجسمانيا وكل مايخص طاسة المزاج ):

الفراخ ف التوابل والقرفة والبطاطس الشرايح والبصل والتوم والصلصة لما تتغلي ع النار حبة بتبقى تحفة وبتعدل المزاج جدا خصوصا خصوصا لو عرفت تظبط التوابل صح الصح وإهتميت يكون في قرن فلفل اخضر حامي جنب الاكل وكوباية لبن عشان تهدي نار الشطة وانتا بتاكل

إعرف توافق برج الدلو مع باقي الأبراج النهاردة

متوافق مع الابراج الترابية والبرمائية

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.